ئەفسەرێكی هاتووچۆی سلێمانی ڕایدەگەیەنێت، حکومەت ئەم بێ منەتیە بەرامبەر بە موچەخۆرەکانی خۆی کۆتایی پێ بهێنێت و دەشڵێت: “دەرگای قوتابخانە ئەهلیەکان جمەی دێت و قوتابخانە حکومیەکانیش داخراون و منداڵەکانمان بە بەرچامانەوە ببنە قوربانی بازرگانی بە پڕۆسەی خوێندنەوە”.
بەهمەن عەبدوڵڵا، ئەفسەری هاتووچۆی سلێمانی لە هەژماری خۆی لە فەیسبووك سەبارەت بە بایكۆتی مامۆستایان و داخستنی دەرگای ناوەندەكانی خوێندن پەیامێكی بڵاوكردۆتەوە و ڕایگەیاندووە، پرۆسەی خوێندن لە خراپترین دۆخیدایە بەرپرسانی بواری پەروەردە تەنها خەمی کورسیەکانی خۆیانە و کات بەڕێ ئەکەن و هیچ ئیزافەیەکیان نیە بۆ سیستەمی پەروەردە.
دەشڵێت: “بایکۆت چارەسەری هیچ شتێکی نەکرد، ناکرێ بەبەرچاومانەوە منداڵی خواپێداو و بەرپرس دەوام بکات و دەرگای قوتابخانە ئەهلیەکان جمەی دێت و قوتابخانە حکومیەکانیش داخراوە و منداڵەکانمان بە بەرچامانەوە ببنە قوربانی بازرگانی بە پرۆسەی خوێندنەوە بۆ ئەوەی قوتابخانە ئەهلیەکان پارەی زیاتر پەیدا بکەن”.
جەختیشی كردۆتەوە، یان ئەوەتا دەرگای قوتابخانە ئەهلیەکانیش بگرن یان دەرگای قوتابخانە حکومیەکان بکەنەوە و چیتر وەکو باوکێک لەژێر ناوی هەر بیانویەک بێت پشتگیری بایکۆتی مامۆستیان ناکەم و پێویستە هەموو لایەک هەڵوێستی هەبێت”.
ڕاشیگەیاندووە، “پێویستە حکومەت ئەم بێ منەتیە بەرامبەر بە موچەخۆرەکانی خۆی کۆتایی پێ بهێنێت، ئەوەی ئەگوزەرێ جگە لە ململانێی سیاسی هیچتر نیە و هەموو حیزبەکان بەرپرسن لە دۆخی خەڵک. ئەم دۆخە ئاوا بەردەوام نابێت و زۆربەی بێدەنگیەکان کارەساتی گەورەی بەدواوە بووە”.
