ئەمڕۆ لە سێهەمین هەفتەی بایکۆت-دا مامۆستایانی ناڕازیی وانەبێژ و میلاک ڕایانگەیاند، لە بایکۆت بەردەوام دەبن تا داواکارییەکانیان جێبەجێدەکرێت.
مامۆستایانی وانەبێژ گردبوونەوەیەکیان ئەنجامدا، محەمەد کەمال، نوێنەری مامۆستایانی وانەبێژ لە لێدوانێکدا بۆ ڕۆژنامەنووسان ڕایگەیاند، “مامۆستایانی وانەبێژ تا ئەو کاتەی دادەمەزرێن و مامۆستایانی میلاک تا وەرگرتنی مووچە و شایستە داراییەکانیان، بەردەوام دەبن لە بایکۆتکردنی هۆڵەکانی خوێندن”.
نوێنەری مامۆستایانی ناڕازی ئاماژەی بەوەکرد، ” بڕیاربوو لە بەردەم بەڕێوەبەرایەتی پەروەردەی ڕۆژئاوا خێمە هەڵبدەین، بەڵام هێزە ئەمنییەکان بە بیانووی جۆراوجۆر ڕێگرییان لێکردین”.
محەمەد کەمال، نوینەری مامۆستایانی وانەبێژ دووپاتی کردەوە، بایکۆتی دەوام لەلایەن مامۆستایان و وەستانی خوێندن، زیانگەیاندنە بە خوێندکاران و پەکخستنی پڕۆسەی خوێندن، بەرپرسیارییەتی لە ئەستۆی حکومەتدایە.
هاوکات لەو چوارچێوەیەدا ئەمڕۆ کاتژمێر١١ بەیاننامەی مامۆستایان و فەرمانبەرانی ناڕازی دەخوێندرێتەوە.
