لە چەند ڕووداوێکی ئاگرکەوتنەوەدا سەدان دۆنم پووش و پاوان و دارستانەکانی سنووری پێنجوێن و شارباژێڕی سەر بە سلێمانی سووتان و ئاگرەکەی چیای ئەزمەڕیش بە هۆی ئاگری نێرگەلەوە بووە.
ئەمڕۆ یەکشەممە، پۆلیسی دارستان و پاراستنی ژینگەی پارێزگای سلێمانی بڵاویکردەوە،
لە چەند ڕووداوێکی جیادا، ئاگر لە سنووری گوندەکانی بەلەکاوی، گۆڵێ، سەرسوراو، میراوا، برالە ، سەربرالەی سنووری ناحیەی گەرمکی سەر بە پێنجوێن کەوتەوە بە هۆیانەوە 220 دۆنم پووش و پاوان و دارستانەکان سووتان.
ئەوەشی خستەڕوو کە دوێنی بە هۆکارێکی نادیار ئاگرێك لە سنوری گوندی شارستێنەی نائیەی سیتەك کەوتەوە و بە هۆیەوە نزیکەی 100 دۆنم پووش و پاوان و چەندین داری سروشتی سووتان.
ئاگرەکانیش لەلایەن تیمەکانی ئاگرکوژێنەوە و بە هاوکاری هاووڵاتییان کوژێندرانەوە.
پۆلیسی دارستان ڕاشیگەیاند لە چەند ڕۆژی ڕابردوودا ئاگرێك لە چیای ئەزمەڕ کەوتەوە و بووە هۆی سووتانی نزیکەی 20 دۆنم پووش و پاوان و لەناوچوونى سەدان داری سروشتی.
ڕوونیشیکردەوە کە دوای پشکنینی سنوورەکە دەرکەوت هۆکارى دروست بوونى ئاگرەکە خەڵوز و پشکۆى نێرگەلەی چەند هاووڵاتیەك بووە کە لەپاش خۆیان بە نەکوژاوەیی بەجێیان هێشتووە.
