ئۆپەراسیۆنەکەی پارێزگای سەڵاحەدین دەریخست کە تیرۆریستانی داعش تەکتیکی شەڕیان گۆڕیوە و لە شوینەکانی حەوانەوەیاندا هێزە ئەمنییەکانی عێراق و هاوپەیمانان دەخەنە داوەوە.
شەوی دووشەممەی ڕابردوو هێزە عێراقییەکان و هاوپەیمانان دوای بۆردومانکردنی شوێنێکی حەوانەوەی تیرۆریستان لە ناوچەی جەزیرە عەیسی پارێزگای سەڵاحەدین، بەمەبەستی دڵنیابوونەوە لە ژمارەی کوژراوەکان دابەزینە سەر شوێنی ئۆپەراسیۆنەکە، بەڵام لەناکاو خۆیان لە ناو بۆسەیەکی داعشدا بینیەوە و لانیکەم سەربازێکی فەڕەنسی تێدا کوژرا.
دەزگای دژە تیرۆری عێراق ڕایگەیاند بۆردومانەکە نەبووە هۆی کوژرانی تیرۆریستەکان بۆیە هێزە عیراقی-فەڕەنسییەکە ناچاربوون دابەزنە شوێنی ئۆپەراسیۆنەکە، بەڵام کەوتنە ناو بۆسەی داعشەوە.
ئەفسەرێکی عێراقی لە لێدوانێکیدا بۆ ڕۆژنامەی شەرقولئەوسەت، باسی لە تەکتیکە نوێیەکەی داعش کرد کە سەر لە هێزە عێراقی و بیانییەکان دەشێوێنیت و ڕاگەیاند، هەرچەندە شوێنی حەوانەوەکە لە ئامێرەکانی چاودێریی گەرمییەوە وا دەردەکەوێت کە چەکداری تێدا بێت، بەڵام لە ڕاستیدا هیچ ئەندامێکی داعشی لەو شوێنەدا نییە.
ڕاشیگەیاند، ئەفسەرانی هەواڵگریی عێراق و هاوپەیمانان پێیانوایە ئەو تەکتیکە بۆ هەڵخەڵەتاندنی درۆنەکان و سەربازە پەڕەشووتەوانەکان بێت بۆئەوەی بخرێنە بۆسەوە.
ئەفسەرەکە وتیشی: “لە بۆسەکەی ئەمدواییەدا دەردەکەوێت کە فڕۆکەوانەکان شوینێکی بێ بایەخیان بۆردومان کردووە”.
ڕۆژنامەی شەرقولئەوسەت لە زاری چەند سەرچاوەیەکەوە بڵاویکردەوە کە لە کاتی ئۆپەراسیۆنەکەی شەوی دووشەممەدا هێزە هاوبەشەکە پەیوەندی لەگەڵ سەربازێکی فەڕەنسی پچڕاوە و شکستی هێناوە لە ڕزگارکردنی، بەڵام تا ئێستا دیار نییە سەربازەکە هەمان ئەو سەربازە بووە کە فەڕەنسا هەواڵی کوژرانی ڕاگەیاندووە، یاخود سەربازێکی دیکەیە.
