کۆمەڵەی زەحمەتکێشان بەرپرسیارێتی شەڕەکەی زڕگوێز دەخاتە ئەستۆی کۆمەڵەی شۆڕشگێڕان و دەڵێت دوو پێشمەرگەیان گیانیان لەدەستداوە.
ئەمڕۆ پێنجشەممە، کومیتەی ناوەندیی کۆمەڵەی زەحمەتکێشانی کوردستان ڕایگەیاند، “لە لایەنی کۆمەڵەی شۆڕشگێر و بە سەرپەرەستی عەبدوڵای ئازەربار هێرش کراوە سەر فێرگە و ئوردوگا و بە قەناسە تەقە لە پێشمەرگە کراوە”.
لە ڕاگەیەندراوەکەدا هاتووە، “بەداخێکی زۆرەوە تا ئێستا دوو پێشمەرگەی کۆمەڵە زەحمەتکێشان بە ناوەکانی سامان ئیبراهیمی و هیوا سادقی گیانی لە دەستداوە”.
ڕوونیشیکردەوە لە دوێنێەوە و “دوای راگەیاندنی کۆتایی پرۆسەی یەکگرتنەوە لە لایەن ئێمەوە، دەستیان داوەتە هەموو جۆرە ئاژاوەیەک و عومەر ئیلخانیزادە لە ناوەراستی ئوردوگاوە هاواری دەکرد با خوێن برژێ. بۆیە زۆر هەوڵماندا کە ئەمە روو نەدا بەڵام ئەوان بۆ قەرەبووی شکستەکانیان لە هیچ کردەوەیەک و جینایەتێک دەس ناپارێزن”. کومیتەی ناوەندیی کۆمەڵەی زەحمەتکێشانی کوردستان ڕاشیگەیاند، “بەرپرسیارێتی شەهید کردنی ئەم دوو پێشمەرگە لە ئەستۆی عەبدوڵا موهتەدی و عومەر ئیلخانیزادە و دەستە راستەکەیان عەبدوڵا ئازەربارە” کە بە عەبە سوور ناسراوە.
