داواكاری گشتی هەرێمی كوردستان لەسەر داواكاری پەرلەمانتارێك لێكۆڵینەوە لە شوێنەكانی مەساج و خراپ بەكارهێنانیان بۆ كاری دیكە دەكات و وەزارەتی ناوخۆ ڕادەستپێرێت بۆ گرتنەبەری ڕێكاری پێویست.
ڕووپاك ئەحمەد، ئەندامی پەرلەمانی كوردستان ڕایگەیاند، بەدواداچوون و كاركردنم دەستپێكردووە بۆ زۆربوونی شوێنەكانی مەساج و بە خراپ بەكارهێنانیان لەڕیگایی داواكاری گشتییەوە.
بەپێی ئەو نووسراوانەی دەست (خەڵك) كەوتوون، داواكاری گشتی بە نووسراوی فەرمی وەزارەتی ناوخۆی ڕاسپاردووە بۆ بەدواداچوون و لێكۆڵینەوە لە زیادبوونی شوێنەكانی مەساج كردن و بەخراپ بەكارهێنانیان.
لای خۆشیەوە، وەزارەتی ناوخۆ بە نووسراوی ژمارە (8891 لە 4-4-2023) سەرجەم پارێزگا و ئیدارە سەربەخۆكانی ڕاسپاردووە بۆ بەدواداچوون و چاودێری وردی شوێنەكانی مەساج كردن.
لەماوەی ڕابردوودا لە چەندین هەڵمەتی جیاوازدا لە شارەكانی هەرێم چەندین سەنتەری مەساج داخراون، بەهۆی ئەوەی بۆ كاری نەشیاو بەكارهێنراون و بە چەند ڕێنماییەك كاركردنی ئەو سەنتەرانە ڕێكخراوە، لە ئێستاشدا بابەتی خراپ بەكارهێنانی سەنتەرەكانی مەساج سەریهەڵداوەتەوە و داواكاری گشتی و وەزارەتی ناوخۆ هاتوونەتە دەنگ لەسەر ئەو پرسە بۆ ڕێگری لە هەر كارێكی نەشیاو.
