![](https://xelk.org/wp-content/uploads/2024/03/awincity2.png)
توێژینەوەیەك كە لەسەر داوای حكومەتی ئەڵمانیا كراوە، دەریخستووە زۆربوونی دیاردە سروشتییە توندەكان لە ئەنجامی گۆڕانی كەشوهەوا تا ساڵی ٢٠٥٠ دەتوانێت نزیكەی هەزار ملیار یۆرۆ زیان بەئابووری ئەڵمانیا بگەیەنێت.
بەپێی توێژینەوەكە، گۆڕانی كەشوهەوا لافاو و شەپۆلەكانی گەرما و چەندین ڕووداوی سرووشتی دیكەی زیادكردووە، ئەگەر ڕێوشوێنی گونجاو نەگیرێتەبەر، لە ماوەی نزیكەی 30 ساڵی ئایندەدا 910 ملیار یۆرۆ زیان بە گەورەترین ئابووری ئەوروپا دەگەیەنێت، كە ئەڵمانیایە.
وەزارەتی ئابووری و كەشوهەوای ئەڵمانیا ڕایگەیاندووە، ئەو ژمارەیە تەنها “خەمڵاندنێكی كەم” بووە بۆ ئەگەریی ڕووداوە سرووشتییەكان، چونكە ئەو شێوازی شیكاركردنەی بۆ لێكۆڵینەوەكە بەكارهێنراوە، نەیتوانیوە هەموو كاریگەرییەكانی گۆڕانی كەشوهەوا لەبەرچاو بگرێت.
وەزارەتەكە، ڕوونیشیكردەوە، توێژینەوەكە نەیتوانیوە زیادبوونی مردن و تێكچوونی كوالێتی ژیان و لەناوچوونی زۆرێك لە ئاژەڵ و ڕووەكەكان لەبەرچاو بگرێت، بەڵام ئەو كەموكوڕییانە لە گرینگی توێژینەوەكە لە ئێستادا كەم ناكەنەوە.
پێشبینی دەكرێت، زیانی ڕاستەقینەی گۆڕانی كەشوهەوا زۆر زیاتر بێت لەوەی توێژینەوەكە خەمڵاندنی بۆ كردووە.
توێژینەوەكە، چەند رێوشوێنێكی پێشنیازكردووە بۆ پەرەپێدانی جۆری ئەو ڕووەكانەی بەرگری كەشوهەوا دەكەن لەگەڵ باشكردنی سیستمەكانی ئاودێری و وەبەرهێنان لە توێژینەوە گشتییەكان، بەوەش دەتوانرێت زیانەكانی گۆڕانی كەشوهەوا كەمبكرێنەوە.
وەزیری دەوڵەتی ئەڵمانیا بۆ ئابووری و كەشوهەوا ستیفان وێنزێل دەڵێت “توێژینەوەكە جەخت لەسەر پێویستی سیاسەتێكی تایبەت بە كەشوهەوا دەكات، سیاسەتێك بە ئامانجی ڕزگاركردنی نەوەكانی داهاتوو لە كاریگەرییەكانی گۆڕانی كەشوهەوابێت”.
ئاماژەی بەوەشكردووە، گۆڕانی كەشوهەوا لێكەوتەی گەورەی ئابووری دروستكردووە، كە دەكرێت خراپتریش بێت.
بەگوێرەی ڕاپۆرتەكە، ئەڵمانیا لە نێوان ساڵانی 2000 تا 2021 بڕی 145 ملیار یۆرۆی بۆ كەشوهەوا خەرجكردووە، كە زیاتر لە نیوەی ئەو خەرجییە لە ساڵی 2018ەوە.