ئێمە لە تۆرە کۆمەڵایەتیەکان

چاوپێکەوتن

دی ڕۆسی: ئه‌م پێگه‌یه‌مان له‌ که‌س نه‌دزیوه‌ و ده‌مانه‌وێت مێژوویه‌کی نوێ بۆ ڕۆما تۆمار بکه‌ین

دانێلی دی ڕۆسی شازاده‌ی نوێ و کاپیتانۆی یانه‌ی ڕۆما چاوپێکه‌وتنێک له‌گه‌ڵ “که‌ناڵ پله‌سی فه‌ره‌نسا” ئه‌نجام ده‌دات، تیایدا ده‌رباره‌ی ڕووبه‌ڕوبونه‌وه‌ی یانه‌ی به‌رشلۆنه‌ و لیڤه‌رپوڵ و چه‌ند بابه‌تێکی تایبه‌تی ده‌دوێت.

ئه‌مه‌ش کورته‌یه‌که‌ له‌چاوپێکه‌وتنه‌که‌:

گه‌یشتن به‌ قۆناغی نیوه‌ی کۆتایی چامپیۆنز لیگ لای تۆ چی ده‌گه‌یه‌نێت؟

من و سه‌رجه‌م ئه‌ندامانی ڕۆما و ڕۆما به‌گشتی خۆشحاڵین به‌م ئه‌نجامه‌ گه‌وره‌یه‌، گه‌یشتنمان به‌ نیوه‌ی کۆتایی واتای ئه‌وه‌یه‌ یه‌کێکیکن له‌چوار گه‌وره‌که‌ی ئه‌وروپا، ئه‌م پێگه‌یه‌ش دوای ماندوبون و هه‌وڵدانی بێوچانمان بووه‌ له‌م چه‌ند وه‌رزه‌دا، ئه‌م پێگه‌یه‌مان له‌هیچ یانه‌یه‌ک نه‌دزیوه‌، به‌ڵکو توانیومانه‌ چه‌ندین یانه‌ی زه‌به‌لاح تێپه‌ڕێنین تا گه‌یشتوین به‌م ئاسته‌ ناوازه‌یه‌.

ڕۆما هه‌ست به‌و ده‌ستکه‌وته‌ گه‌وره‌یه‌ ده‌کات که‌ به‌ده‌ستتان هێناوه‌؟

بێگومان، هانده‌ران هه‌میشه‌ پاڵپشتمان بوون به‌تایبه‌ت دوای ئه‌وه‌ی توانیمان ڕیمۆنتادا به‌رامبه‌ر یانه‌ی به‌رشلۆنه‌ تۆمار بکه‌ین، له‌ئێستادا باس باسی ئێمه‌ و ده‌ستکه‌وته‌ گه‌وره‌که‌مانه‌ و خه‌ڵکی ڕۆما به‌ “چامپیۆنز لیگ” هه‌ناسه‌ ده‌ده‌ن، پێموابێت خه‌ڵکێکی زۆرمان له‌ ڕۆما و ده‌ره‌وه‌ی ڕۆما دڵخۆشکردووه‌، تا ئه‌وان به‌رده‌وام بن له‌ هاندانمان ئێمه‌ش هه‌وڵ ده‌ده‌ین ڕێڕه‌وی سه‌رکه‌وتنه‌کان به‌رده‌وام بێت.

ڕووبه‌ڕوبونه‌وه‌ی به‌رشلۆنه‌ باشترین بوو به‌نسبه‌ت ئێوه‌وه‌؟

به‌ڵێ، پێموابێت رووبه‌ڕوبونه‌وه‌که‌ باشترین بوو له‌مێژووی ده‌ بۆ ٢٠ ساڵی ڕابردوی یانه‌که‌ماندا، به‌وپێیه‌ی به‌رامبه‌ر ڕکابه‌رێکی مێژوویی به‌توانا یارییمان کرد و حه‌زێکی بێوێنه‌مان بۆ سه‌رکه‌وتن نیشاندا، له‌بیریشی نه‌که‌ین هانده‌ران له‌ ئۆڵۆمپیاکۆ که‌شێکی ئاگرینیان خولقاند، شه‌وێکی سیحری بوو مێژوومان تۆمارکرد و هه‌رگیز له‌بیر ناکرێت، وه‌ک وتم هه‌ست به‌ فه‌خر و شانازی ده‌که‌ین له‌به‌رئه‌وه‌ی ئه‌رکێکی قورس و گه‌وره‌مان له‌به‌رژه‌وه‌ندی خۆمان یه‌کلایی کرده‌وه‌.

دوای یارییه‌که‌ هه‌ستمان کرد ئه‌نجامه‌که‌ کاریگه‌ری له‌سه‌رت هه‌بووه‌، ته‌نانه‌ت ده‌ستت کرد به‌گریان…

ئه‌وه‌ ڕاسته‌، له‌به‌رئه‌وه‌ی ئه‌رکێکی مه‌حاڵمان ئه‌نجامدا و ئه‌و دۆخه‌ی هانده‌رانیشمان دروستیان کرد بێوێنه‌ بوو، گه‌ڕانه‌وه‌مان به‌و ئه‌نجامه‌ گه‌وره‌یه‌ کاریگه‌ری له‌سه‌رم دروست کرد، له‌دوای یارییه‌که‌ له‌گه‌ڵ پیرلۆ چومه‌ ده‌ره‌وه‌ بۆ نان خواردن، ئه‌و که‌ هانده‌ری ڕۆما نییه‌ له‌ من دڵخۆشتر بوو.

ئه‌م وه‌رزه‌ی ڕۆما چی جیاوازه‌ له‌ وه‌رزی ڕابردو؟

قورسه‌ ئه‌وه‌تان بۆ ڕوونبکه‌مه‌وه‌، به‌ڵام ڕاهێنه‌ره‌که‌مان هه‌میشه‌ داوای سه‌رکه‌وتنمان لێده‌کات و به‌ بردنه‌وه‌ زیاتر به‌هیچی تر ڕازی نابێت، ئه‌وه‌ش کاریگه‌ری له‌سه‌رمان دروست کردووه‌ و که‌شێکی له‌باری له‌ژووری خۆگۆڕینه‌کان هێناوه‌ته‌ کایه‌، ڕوحیه‌تی یارییکردن به‌کۆمه‌ڵ کاریگه‌ری ئه‌رێنی له‌سه‌رمان هه‌بووه‌ و توانیومانه‌ به‌ربه‌سته‌ گه‌وره‌کان تێپه‌ڕینین، ئه‌وه‌ی له‌قۆناغی چاره‌کی کۆتایی به‌رامبه‌ر به‌رشلۆنه‌ روویدا باشترین به‌ڵگه‌یه‌ و یارییه‌کی شێتانه‌مان کرد له‌پێناو بردنه‌وه‌دا.

ئێستا یارییه‌کی ئاگرینی تر به‌رامبه‌ر لیڤه‌رپوڵ چاوه‌ڕوانتان ده‌کات، پێتوایه‌ بتوانن سیناریۆی یارییه‌که‌ی بارسا دووباره‌ بکه‌نه‌وه‌؟

ڕووبه‌ڕوبونه‌وه‌یه‌کی زۆر ئاڵۆزه‌، دووباره‌کردنه‌وه‌ی سیناریۆی یارییه‌که‌ی به‌رشلۆنه‌ش مه‌حاڵ نییه‌، به‌ڵام به‌ئاسانی به‌ده‌ست نایه‌ت، به‌رامبه‌ر ڕکابه‌رێکی به‌هێز یاریی ده‌که‌ین که‌ ئه‌نجامی یاریی چون له‌به‌رژه‌وه‌ندیه‌تی، ده‌بینم ئه‌ستێره‌کانی ڕۆما هه‌ست به‌ به‌رپرسیارێتی ده‌که‌ن، بۆیه‌ دڵنیابن له‌یاریی گه‌ڕانه‌وه‌دا هه‌موو قورسایی خۆمان ده‌ده‌ین به‌سه‌ریاندا و هه‌رگیز بیرمان له‌وه‌ نه‌کردۆته‌وه‌ له‌نیوه‌ی ڕێگادا خۆمان بده‌ین به‌ده‌سته‌وه‌.

موحه‌مه‌د سه‌ڵاح باش ده‌ناسیت، چی ده‌ڵێیت له‌باره‌یه‌وه‌؟

(به‌پێکه‌نینه‌وه‌) چه‌ندین نامه‌ی هه‌ڕه‌شه‌مان بۆ مۆبایله‌که‌ی ناردووه‌ و داوامان لێکردووه بۆ یاریی گه‌ڕانه‌وه‌‌ ئاگای له‌خۆی بێت… سه‌ڵاح که‌سێکی به‌ڕێز و نایابه‌، له‌سه‌ر ئاستی تۆپی پێ یاریزانێکی ناوازه‌ و گه‌وره‌یه‌، تواناکانی بێوێنه‌ن.

پێتوایه‌ ڕۆما له‌توانایدایه‌ ببێته‌ پاڵه‌وانی خولی یانه‌ پاڵه‌وانه‌کان؟

له‌ڕاستیدا هه‌رگیز بیرم له‌و بابه‌ته‌ نه‌کردۆته‌وه‌، چونکه‌ من یاریی له‌دوای یاریی بیر ده‌که‌مه‌وه‌، هه‌وڵده‌ده‌ین یارییه‌ک ببه‌ینه‌وه‌ ئینجا بیر له‌یاریی دواتر ده‌که‌ینه‌وه‌، وه‌ک وتم یارییه‌کی ئاڵۆز به‌رامبه‌ر لیڤه‌رپوڵ چاوه‌ڕوانمان ده‌کات، ئه‌گه‌ر سه‌رکه‌وتو بین ئینجا بیر له‌و ڕکابه‌ره‌ به‌هێزه‌ی تر ده‌که‌ینه‌وه‌، ئامانجمان له‌ئێستادا گه‌یشتنه‌ به‌ یاریی کۆتایی و ئه‌رکمان ئاڵۆزه‌، به‌ڵام مه‌حاڵ نییه‌.

بویت به‌ کاپیتانۆی ڕۆما، هه‌ست به‌چی ده‌که‌یت؟

خۆشحاڵم زۆر، ئه‌وه‌ شانازییه‌کی گه‌وره‌یه‌، فه‌خر و شانازیم ته‌نها بۆ لێدوانه‌ ڕۆژنامه‌وانیه‌کان نییه‌، به‌ڵکو من پێش ئه‌وه‌ی یاریزانی ڕۆما بم هانده‌رێکی سه‌رسه‌ختیم، هه‌میشه‌ له‌خزمه‌تی یانه‌که‌مدا ده‌بم و هه‌وڵی سه‌رخستنی ده‌ده‌م، شتێکی ناوازه‌یه‌ کاپیتانۆ و ڕابه‌ری یانه‌یه‌کی گه‌وره‌ی وه‌ک ڕۆما بیت، به‌ڵام ئه‌وه‌ی راستی بێت تائێستاش که‌ ده‌ڵێن کاپیتانۆی ڕۆما لێره‌وه‌ ڕۆیشتووه‌ ڕاسته‌وخۆ فرانچیسکۆ تۆتی-مان بیر ده‌که‌وێته‌وه‌.

باسی تۆتی ده‌که‌یت، تۆش به‌هه‌مان شێوه‌ی ئه‌و له‌بری ئه‌وه‌ی په‌یوه‌ندی به‌ ڕیاڵ مه‌درید و به‌رشلۆنه‌وه‌ بکه‌یت له‌ ڕۆما مایته‌وه‌؟

ده‌زانم بڕیاره‌که‌م له‌سه‌ر ئاستی که‌سایه‌تی و تایبه‌تی خۆم هه‌ڵه‌ بوو‌، ئاسان نییه‌ یانه‌ گه‌روه‌کان ڕه‌ت بکه‌یته‌وه‌ له‌یانه‌ی ڕۆما به‌رده‌وام بیت، به‌ڵام به‌نسبه‌ت منه‌وه‌ گرنگبوو له‌ژیانمدا پاڵپێوه‌نه‌رێکی به‌هێزم هه‌بێت، به‌خۆمم وت که‌ پێویسته‌ بمێنمه‌وه‌ و له‌م یانه‌یه‌ شتێکی گه‌وره‌ به‌ده‌ست بهێنم پێشتر که‌س نه‌یکردبێت، ده‌زانم خه‌ونه‌که‌م زۆر قورسه‌ ببێته‌ ڕاستی، به‌ڵام به‌هه‌موو توانامه‌وه‌ هه‌وڵی بۆ ده‌ده‌م.

چاوپێکەوتن

مێسی خۆشترین و ناخۆشترین ساتەکانی ژیانی و باشترین گۆڵ و ڕاهێنەر ئاشکرا دەکات

خەڵک سپۆرت

لیۆ مێسی ئەفسانەی زیندوی یانەی بەرشلۆنە لەچاوپێکەوتنێکدا وەڵامی چەندین پرسیاری گرنگ و پەیوەندیدار بە خودی خۆیەوە دەداتەوە و باشترین ڕاهێنەر لەژیانی وەرزشییدا دیاری دەکات.

لیۆی ئەفسانەی بارسا و ئەرجەنتین دیدارێک لەگەڵ ئێزگەی “ڕاک ١”ی کەتەلۆنی ئەنجام دەدات و بەم شێوەیە وەڵامی پرسیارە گرنگەکان دەداتەوە:

چۆن بووە باشترین؟

“هەموو وەرزێک هەوڵدەدەم تواناکانم بەرەوپێش ببەم، پێموابێت کارکردن لەگەڵ پیپ گواردیۆلا زۆر بەسود بوو، وەک یاریزانێک زۆر بەرەوپێش چووم”

خۆشترین ساتەکانی ژیانی

“ئەم پرسیارە قورسە، چونکە من لەژیانی وەرزشیمدا بەچەندین ساتی خۆشدا تێپەڕم کرد و چەندین قۆناغم تێپەڕاند، پێموابێت سەردەمی گواردیۆلا خۆشترین ساتەکانی ژیانم بوو”.

ناخۆشترین ساتەکانی ژیانی

ساڵی ٢٠١٣ بۆ ٢٠١٤ دووچاری پێکان بووم و ماوەی دوو تا سێ مانگ لەیاریکردن دابڕام، دوای ئەوە بۆ قۆناغی ڕیکەڤەری گەڕامەوە بۆ ئەرجەنتین، ئەوە ناخۆشترین ساتەکانی ژیانی وەرزشییم بوو”.

جوانترین گۆڵ

ئەو گۆڵەی لە ڕۆما بەرامبەر مانچستەر یونایتد بەلێدانی سەر تۆمارم کرد، بەهۆیەوە نازناوی چامپیۆنزلیگمان بەدەستهێنا”.

قورسترین هێڵی بەرگری تا ئێستا ڕووبەڕوی بووەتەوە

یەکێک بەتایبەتی؟ نازانم، ئێمە هەمیشە ڕووبەڕوی ڕکابەرە سەرسەختەکان بوینەتەوە، پێموابێت یانە ئینگلیزیەکان ڕووبەڕوبونەوەیان قورس بووە، ناوی یانەیەک بەتایبەت ناهێنم، چونکە ژمارەیان زۆر بووە”

بەهێزترین ڕکابەر تائێستا ڕووبەڕوی بۆتەوە

“هەڵبژاردەی ئیسپانیا، یارییەکی دۆستانەی ئەرجەنتین بوو لە ساڵی ٢٠١٠ بەرامبەر ئیسپانیا”

باشترین یاریی

“خولی یانە پاڵەوانەکان، قۆناغی چارەکی کۆتایی بەرامبەر ڕیاڵ مەدرید کە بەئەنجامی دوو گۆڵی بێوەڵام بردنەوەمان بەدەست هێنا، وەرزی ٢٠١٠/٢٠١١ بەرامبەر پێکهاتەکەی جوزێ مۆرینیۆ”

ئەو هاوڕێیەی لێی پەشیمانە

“هەمیشە پەیوەندی توندوتۆڵم لەگەڵ هاوڕێکانم هەبووە و لەو باوەڕەدا نیم لە هاوڕێیەتی هیچیان پەشیمان بم”

باشترین ڕاهێنەر

“بەڕای من گواردیۆلا لەهەمووان باشتر بوو، هەروەها لویس ئینریکی، زۆر نزیکن لەیەکەوە”.

 

بەردەوام بە لە خوێندنەوە

چاوپێکەوتن

مێسی: کێشە لەنێوان من و گریزماندا نییە و لە ژووری جلگۆڕینەکان بارودۆخی هەمووان باشە

خەڵک سپۆرت

لیۆ مێسی ئەفسانەی زیندوی ئەرجەنتین و یانەی بەرشلۆنە چاوپێکەوتنێک لەگەڵ ئێزگەی “ئوندا سیرۆ”ی ئیسپانی ئەنجام دەدات و وەڵامی چەندین پرسیاری گرنگ دەداتەوە.

ئەمەش کورتەیەکە لە چاوپێکەوتنەکە:

نهێنی بردنەوەتان لە ئینتەرمیلان چی بوو؟

تایمی دووەم زۆر باش بوو، توانیمان باشتر تۆپەکان بگەڕێنینەوە و کۆنترۆڵی یاریگامان کرد، گرنگترین شت بردنەوە بوو، چونکە ئێمە بەهۆی یەکسانبوون بەرامبەر دۆرتمۆند باردۆخمان لەکۆمەڵەکەدا باش نەبوو.

 

“ڤیدال لە هێڵی ناوەند چارەسەری زۆرمان پێدەدات، بۆ بارسا زۆر گرنگە”

 

سەرەڕای گەڕانەوەت لەپێکان، بەڵام ئاستێکی بەرزت پێشکەش کرد؟

زۆر خۆشحاڵم کە ٩٠ خولەک بەشداریم کرد، دوای یارییەکە زۆر زۆر ماندو بووم، بەڵام خۆشحاڵبووم بەو ئاستەی پێشکەشم کرد، بەوشێوەیە توانیم لە بارودۆخی جەستەیی خۆم تێبگەم و تێگەیشتم لەوەی کە دەبێت بە چ ڕیتمێک ڕووبەڕوبونەوەکان ئەنجام بدەم.

ئایا ڤیدال لەسەر ئاستی هێڵی ناوەند جیاوازی دروست کرد؟

ڤیدال لە هێڵی ناوەند چارەسەری زۆرمان پێدەدات، یاریزانێکی بەهێزە لە گەڕاندنەوە و بچڕاندنی تۆپەکان، گرنگیشە یاریزانێک هەلی یاریکردنی پێدەدرێت بە گرنگی خۆی بزانێت، ڤیدال بۆ بارسا زۆر گرنگە.

پەیوەندیتان لەگەڵ ئیدارەی یانە چۆنە، لێدوانەکانی پیکێ هەرایان ناوەتەوە؟

ئێمە باشین، دەمەوێت تەنها ئاماژە بە گرنگی سەرکەوتنەکەمان بکەم لە خولی یانە پاڵەوانەکانی ئەوروپا.

 

“پەیوەندی نێوان یاریزانان لە ژووری جل گۆڕینەکان باشە، ئەوەی پیکێ لەبارەی ئامادەکاریەکانی ئەمریکاوە باسی کردووە ڕەخنەگرتن نییە لە ئیدارەی یانە”

 

بۆچی وا دەردەکەوێت پەیوەندیت لەگەڵ گریزمان خراپە؟

هیچ کێشەیەک لەنێوانماندا نییە، هەنگاو بە هەنگاو لە کەمەوە بۆ زیاتر بەیەکەوە خۆمان دەگونجێنین، پەیوەندی نێوانمان لە ژووری جلگۆڕینەکان زۆر باشە.

ڕات چییە دەربارەی لێدوانەکانی پیکێ؟

وەک وتم پەیوەندی نێوان سەرجەم یاریزانان لە ژووری جل گۆڕینەکان باشە، ئەوەی پیکێ لەبارەی ئامادەکاریەکانی ئەمریکاوە باسی کردووە ڕەخنەگرتن نییە لە ئیدارەی یانە، چونکە یاریزان کاتێک گەشت دەکات بەباشی مەشق ناکات، بۆیە پێویستە یانەکەمان ئەو بۆچونانە بەهەند وەربگرێت.

ماوەی ١٠ ساڵ تێپەڕ دەبێت بەسەر یەکەم خەڵاتی بالۆن دۆر کە بەدەستت هێنا، چیت هەیە لەو بارەیەوە؟

کاتێکی زۆر تێپەڕیوە، لەو کاتەوە تائێستا زۆر شت ڕوویاندا، وەکو یاریزان و کەسێک بەرەوپێشچووم، ئێستا خاوەنی هاوسەرێک و سێ منداڵم، بەداخەوە خۆشییەکان بەخێرایی تێپەڕیان کرد.

 

“نەمتوانی تاموچێژ لەهەموو ئەو دەستکەوتانە وەربگرم کە بەدەستم هێنان، لەبەرئەوەی بەردەوام ململانێی نوێ دێتە بەردەمت و ناچاریت بەردەوام بیت”

 

کەواتە تاموچێژت لە سەرکەوتنەکانت وەرنەگرتووە؟

لە بواری تۆپی پێدا ناتوانێت تاموچێژ لەهەموو ئەو دەستکەوتانە وەربگریت کە بەدەستی دەهێنیت، لەبەرئەوەی بەردەوام ململانێی نوێ دێتە بەردەمت و ناچاریت بەردەوام بیت، کاتێک بیر لەوانە دەکەیتەوە کە ڕویانداوە ئینجا تێدەگەیت چ واتایەکی هەیە، ئەوەی ڕوویدا لەژیانمدا سەردەمێکی جوان بوو، ڕۆژ لەدوای ڕۆژ تاموچێژی زیاتری لێوەردەگرم.

ئامۆژگاریت چییە بۆ لاوان؟

ئامۆژگاریان دەکەم کە تاموچێژ لەتۆپی پێ وەربگرن و بەردەوام بن، پێویست ناکات هەڵسوکەوت و ڕەفتاری خۆیان بگۆڕن، ئەوەش لەهەموو شتێک گرنگترە، ئەوەی دەمێنێتەوە لەکەمەوە بۆ زۆر دواتر پێی دەگەن، تەنها خودا دەزانێت چی دەکات و چۆن ژیانیان دەگۆڕێت، لەگەڵ تێپەڕینی کات دەتوانن خەڵاتەکان بەدەست بهێنن، بەڵام وەک وتم گرنگترین شت ئەوەیە تاموچێژ لەتۆپی پێ وەربگرن.

بەردەوام بە لە خوێندنەوە

چاوپێکەوتن

هازارد: لەبەردەم زێدان وەک منداڵێکی بچوک دەردەکەوم و هاندەران داوای زیاترم لێدەکەن !

خەڵک سپۆرت – پێگەی یوێفا

ئیدین هازاردی بەلجیکی ئەستێرەی یانەی ڕیاڵ مەدرید، چاوپێکەوتنێک لەگەڵ پێگەی یەکێتی تۆپی پیی ئەوروپا ئەنجام دەدات و وەڵامی چەندین پرسیاری گرنگ دەداتەوە، ئەمەش کورتەیەکە لەچاوپێکەوتنەکە:

بۆچی یانەی ڕیاڵ مەدریدت هەڵبژارد؟

هەمیشە یانەی ڕیاڵ مەدرید لە پلانەکانمدا بووە، کە لەیانەی چێڵسی بووم هەمیشە حەزم دەکرد خەونەکانم بە یاریکردن بۆ یانەی ڕیاڵ مەدرید بهێنمە دی، هەرگیز لەو باوەڕەدا نەبووم ماوەی حەوت ساڵ لە چێڵسی بەردەوام بم، بەڵام هەموو وەرزێک دەستکەوتێکم هەبووو ئەوەش پاڵپێوەنەربوو بۆ بەردەوامبوونم لەو یانەیە.

چ شتێکی ڕیاڵ مەدرید سەرنجی ڕادەکێشایت؟

یانەیەکی ناسراوە و زینەدین زێدان یاریی بۆ کردووە، هەمیشە خەونم ئەوەبوو لە سانتیاگۆ بێرنابیۆ یاریی بکەم، بە منداڵیش هاندەری یانەی شاهانە بووم و لەئێستادا خەونەکەم بەدیهێناوە، هیوادارم سود لەم تاقیکردنەوە گەورەیە وەربگرم.

پێتوایە ڕیاڵ مەدرید لەگەڵ خولی یانە پاڵەوانەکان پەیوەندیەکی قوڵیان هەیە؟

بەڵێ بێگومان، کاتێک دێیتە ئەم یانە مەزنە و ئەو هەموو نازناوە ئەوروپیە لەمۆزەخانەی یانەکە دەبینیت، هەست دەکەیت هاندەران داوای زیاترت لێدەکەن بەتایبەت بۆ چنینەوەی نازناوی خولی یانە پاڵەوانەکان.

لەگەڵ زێدان کارکردن چۆن بەڕێدەکات؟

زۆر خۆشحاڵم، هەست دەکەم منداڵێکی بچوکم لەبەردەمیدا، ڕۆژانە لەم ڕاهێنەرە و لە هاوڕێیانەوە فێردەبم، شتێکی ناوازەیە لەگەڵ ڕاهێنەرێک وەها گەورە کاربکەیت، کە قسەی لەگەڵ دەکەیت هەست بەخۆت دەکەیت، لێرە هەموو وەرزێک چەندین ئامانج دیاری دەکرێت، لەبەرئەوەیە خاوەنی زۆرترین نازناون.

بیری گۆڵەکەی زێدانت دەکەوێتەوە بەرامبەر لیڤەرکوزن؟

باوەڕ ناکەم بەشێوەی ڕاستەوخۆ بینیبێتم، چونکە منداڵ بووم و ناچاربووم لەو کاتەدا بخەوم.

بەڵام دواتر بینیوتە، وایە؟

بەڵێ، ڕۆژی دواتر لەگەڵ براکەم سەیرمان کردەوە، لە باخچەی ماڵەکەمان هەوڵماندا لاسایی بکەینەوە و سەرکەوتوو نەبووین، ئەوەش خۆی لەخۆیدا یادگارییەکی خۆش بوو.

جگە لە زێدان چ یاریزانێکی ئەو سەردەمەی ڕیاڵ مەدریدت لەبیرە؟

ڕائول، فیگۆ و ڕۆناڵدۆ، تەماشاکردنیان بەیەکەوە نایاب بوو هەر ئەوەش وایدەکرد سەرنجت بچێتە سەر یانەکە، ئەم ناوە گەورانە بەیەکەوە یارییان دەکرد و بەشێک لەمێژووی یانەکەیان نوسییەوە.

لەگەڵ ڕیاڵ مەدرید ئامانجت چییە؟

لە یانەیەکی گەورەی وەک ڕیاڵ مەدرید پێویست دەکات ئاستێکی بەهێز پێشکەش بکەم و لەتۆمارکردنی گۆڵدا کەمتەرخەم نەبم، هەوڵدەدەم ئەو کارە بکەم.

ئەو ڕۆژەی بە هاندەرانی مەدرید ناسێنرای هەستت بەچی کرد؟

هەستێکی نایاب و بێوێنە بوو، کاتێک هاتمە نێو یاریگاوە هەستم کرد لە ماڵی خۆمدام، چونکە پێشتر تامەزرۆبووم و زۆر تەماشای ئەم یاریگایەم کردبوو، لە کۆنگرە ڕۆژنامەوانیەکەشدا هەستم بە شتێکی جیاواز کرد، بەتایبەت کاتێک ئەو هەموو هاندەرەم بینی و سەرۆکی یانە لەبارەی منەوە قسەی کرد.

هەست بە فشار دەکەیت؟

هەوڵدەدەم بەوپەڕی تواناوە لەنێو یاریگا تاموچێژ لە تۆپی پێ وەربگرم و ئەگەر ئەو کارەش بکەم ئەنجامێکی باشم دەبێت، لەم یانە گەورەیە هەمیشە داواکراوە گۆڵ تۆمار بکەیت و یارییەکان ببەیتەوە، منیش ئەوەم دەوێت، لەچێڵسی بەهەمان شێوە ژیام و هەوڵدەدەم هەمان شت دووبارە بکەمەوە.

چ شتێک لە ئیسپانیا زۆر سەرنجڕاکێش بووە بەلاتەوە؟

هاندەران، هاندەران لێرە زۆر پاڵپشتی یاریزانان دەکەن، لە ئینگلتەرا لایەنگری بۆ یانەکان زۆرە لەلایەن هاندەرانەوە، بەڵام لێرە هەمووان گرنگی بە یاریزانان و یانەکان دەدەن لە گەنجەوە بۆ پیر.

لە ڕیاڵ مەدرید پێویستە چ شتێک لەخۆتدا باشتر بکەیت؟

زۆر شت پێویستیان بە باشترکردنە، یاریکردن لە خولێکی جیاواز واتای فێربونی زیاتر، شێوازی یاریکردن و ئامادەکاری بۆ یارییەکان لێرە جیاوازە، ڕۆژانە شتی زیاتر فێردەبم و خەسڵەتە هونەریەکانم باشتر دەکەم، بەڵام قورسە ئەگەر بڵێم لەڕووی تاکتیکی و هونەریەوە دەگۆڕێم.

جیاوازی نێوان چێڵسی و ڕیاڵ مەدرید چییە؟

لە چێڵسی کاتێک یارییەکمان دەدۆڕاند هەستمان بە نائارامی و خەمباری دەکرد، چ ئێمە چ هاندەران، هەرگیز هەستم نەکردووە کارەساتبارم، بەڵام لە ڕیاڵ مەدرید بارودۆخەکە جیاوازە، بەنسبەت هاندەرانەوە تۆپی پێ هەموو شتێکە و ئەوەش لەسەر پێی یاریزانان وەستاوە، لێرە دۆراندن کارەساتە.

جگە لە تۆپی پێ هیوایەتت چییە؟ خۆت بەچیەوە سەرقاڵ دەکەیت؟

حەزدەکەم کاتەکانم لەگەڵ خێزانەکەم بەسەربەرم و هەندێک وەرزشی جیاواز ئەنجام بدەم، هەروەها چونە دەرەوە لەگەڵ هاوسەرەکەم و بابەتی خێزانی تر.

لەدوای تۆپی پێ حەزت بە چ جۆرە وەرزشێکە؟

حەزم لە یاریی باسکەیە،بەڵام ئاساییە بەلامەوە ئەگەر ماوەی سێ هەفتەش یارییەکی باسکە نەبینم، ڕۆژانە یاریی تۆپی پێ دەکەم و شتێکی باشە هەندێجار بەهۆی وەرزشێکی ترەوە کەمێک داببڕێم.

بەردەوام بە لە خوێندنەوە

کوردستان