ئێمە لە تۆرە کۆمەڵایەتیەکان
ریکلام

کوردستان

كۆمەڵ: باسكردنی لیستی ئیسلامی بەسەرچوو

خەڵك-بەشی هەواڵ

ئەندامێكی سەركردایەتی كۆمەڵی ئیسلامی رایدەگەیەنێت، باسكردن لە دروستكردنی لیستی ئیسلامی بەسەرچووە و بۆ ئەم قۆناغە پێویست بە باسكردنی ناكات.

لە دوو ساڵی رابردوودا ئیسلامییەكانی كوردستان بۆ چەندینجار لەسەر ئاستی باڵا كۆبوونەوە بۆ پێكهێنانی لیستێكی ئیسلامی بۆ هەڵبژاردنەكان، بەڵام لە هەڵبژاردنەكانی عێراق سەركەوتوو نەبوون‌و كۆمەڵ ئەو هەوڵەی رەتكردەوە، بەڵام یەكگرتوو و بزووتنەوە ‌و بزاڤی چاكسازی ‌و گەشە ئەو لیستەیان پێكهێنا، لە ئێستاشداو بەهۆی بوونی ساختەكارییەكان لە هەڵبژاردنەكانی عێراق شەش لایەنی ناڕازی دەیانەوێ هاوپەیمانییەك دروست بكەن‌و بەرپرسێكی باڵای كۆمەڵی ئیسلامیش ئاشكرایدەكات، بۆ بەگژداچوونەوەی سیستمی حوكمڕانی پێویستمان بە لیستی ئیسلامیی نییە لەم قۆناغەدا.

سەعید هەركی ئەندامی سەركردایەتی كۆمەڵی ئیسلامی بە (خەڵك)ی راگەیاند، لەم قۆناغەدا پێویست نییە لیستی ئیسلامی هەبێت، چونكە قۆناغەكانی لیستی ئیسلامی قۆناعێك بوون رۆیشتن‌و بوون بە مێژوو.

وتیشی “نابێت بێیت مێژوو دووبارە بكەیتەوە كە لەوانەیە بۆ پێشوو سودێكی هەبووبێت، بەڵام ئێستا هیچ سودێكی نییە”.

رونیشیكردەوە، ئەو حزبانەی ئێستا دروست دەبن حزبی جەماوەرین، گۆڕان دەڵێت حزبێكی جەماوەرییم ‌و ناڵێت حزبێكی ئایدۆلۆجی‌و عەلمانیم‌و دژایەتی ئیسلامی ناكات‌و هەموو خەڵكێكی تێدایە، بەهەمانشێوە هاوپەیمانی حزبێكی جەماوەرییەو ئایدۆلۆژیای نییەو ئیسلامی‌و عەلمانی لە دەوری كۆبووەتەوە.

ئاشكراشیكرد، كێشەكان پێشتر ئەوە بوون عەلمانییەكان بە ئێمە رازی نەبوون، ئێمەش لەوان رازی نەبووین، بەڵام ئێستا لەو كێشانەمان نەماوە لە هەرێم، ئەوەی ئێستا هەیە كێشەی سیستمی حوكمڕانییە لە هەرێم، كێشەی گەندەڵی‌و بەهەدەردانی موڵك‌و سامانی خەڵكە، دەبێت هەموومان پێكەوە كاری بۆ بكەین، لەبەرئەوە لیستی ئیسلامی كۆتایی هاتووەو ئەم قۆناغانە هی ئەوە نییە باسی لیستی ئیسلامی بكرێت.

کوردستان

کوڕەزایەکی خومەینی ھاوشێوەی باپیری لە نەجەف نیشتەجێ دەبێت

خەڵک-

میدیاکانی ئێران ئاماژە بەوە دەکەن، نەوەیەکی ئایەتوڵڵا خومەینی بە نیازە بێتە شاری نەجەف و بۆ ماوەی چەند ساڵێک ھاوشێوەی باپیرەی، لەو شارە بمێنێتەوە.

وەک ئەوەی میدیاکانی ئێران دەڵێن، بڕیارە عەلی خومەینی، نەوەی روحوڵڵا خومەینی ڕابەری شۆڕشی ئیسلامیی شوێنی نیشتەجێبوونی خۆی بۆ شاری نەجەف بگوازێتەوە و بۆ ماوەی چەند ساڵێک ھاوشێوەی باپیرەی لەو شارە نیشتەجێ ببێت.

عەلی خومەینی تەمەنی ٣٣ ساڵە و کوڕی ئەحمەد خومەینییە کە چەند ساڵێک پاش مردنی باوکی بەھۆکارێکی نادیار گیانی لەدەستداوە.

روحوڵڵا خومەینی کە لە حەفتانی سەدەی ڕابردوو لە ئێران ھەڵات، ڕووی لە شاری نەجەف کرد و بۆ ماوەی چەند ساڵێک لەو شارە مایەوە، دواتر لەسەر داوای ئێران، حکومەتی ئەوکاتی عیراق لە نەجەف دەریکرد و رۆشتە فەرەنسا و تا شوباتی ١٩٧٩ لەو وڵاتە مایەوە و دواتر گەڕایەوە ئێران.

 

بەردەوام بە لە خوێندنەوە

کوردستان

پارتی: خێزانی فوئاد حسێن مەسیحییە نەک جولەکە

خەڵک-

پاش کاندید کردنی فوئاد حسێن سەرۆکی دیوانی سەرۆکایەتیی ھەرێمی کوردستان بۆ پۆستی سەرۆکایەتیی کۆماری عیراق، چەند میدیا و تۆڕی کۆمەڵایەتیی عیراق بڵاویانکردەوە، خێزانی ناوبراو جولەکەیە و لە کاتی ھەڵبژاردنی بە سەرۆک کۆمار، ژنێکی جولەکە دەبێت بە خانمی یەکەمی عیراق.

بەڵام سۆمەرییە نیوز، لە زاری رێناس جانۆ پەرلەمانتاری پێشووی پارتی لە پەرلەمانی عیراق، ڕایگەیاندووە: “خێزانی فوئاد حسێن خانمێكی ھۆڵەندییە و بە ئایین مه‌سیحی پرۆتیستانتە‌، ئەو ژنە له‌ بنه‌ماڵه‌ی مۆنتسۆرییه‌ كه‌ له‌هه‌مو ئه‌وروپا به‌ناوبانگن نه‌ك ته‌نیا له‌ هۆڵه‌ندا.”

ئەوەشی ڕاگەیاندووە: “بنه‌ماڵه‌ی مۆنتسۆری خزمه‌تێكی زۆریان له‌بواری په‌روه‌رده‌ و فێركردندا كردووه‌ و ماریا مۆنتسۆری یه‌كێكه‌ له‌ بیرمه‌نده‌كانی ئه‌و بنه‌ماڵه‌یه ‌کە خاوه‌نی هه‌زاران قوتابخانه‌ن له‌ سه‌رتاسه‌ری دنیادا.”

 

بەردەوام بە لە خوێندنەوە

کوردستان

بە وشکبوونی دەریاچەی ورمێ شارێک نامێنێت بە ناوی تەبرێز

خەڵک-

جێگری سه‌رۆكی رێكخراوی پاراستنی ژینگه‌ی ئێران ئاماژە بەوە دەکات، ئەگەر دەریاچەی ورمێ وشک ببێت، ئەوا شارێک نامێنێت بە ناوی تەبرێزەوە.

مه‌سعود ته‌جریشی جێگری سه‌رۆكی رێكخراوی پاراستنی ژینگه‌ی ئێران لە میانی وتووێژێکی لەگەڵ رۆژنامەی (کارگران) دا ڕەخنەی توندی لە بەرپرسانی ئێران گرت سەبارەت بە فەرامۆشکردنی کارەساتی وشکبوونی دەریاچەی ورمێ.

ئەو ڕاگەیاندووە: “ئه‌گه‌ر ده‌ریاچه‌ی ورمێ وشك بكات، ئه‌وا شارێك نامێنێت به‌ناوی ته‌برێز و پێویسته‌ ئەو شارە لە شوێنی خۆی بگوازرێته‌وه.”

ئەوەشی ڕاگەیاندووە: وشكبوونی ده‌ریاچه‌كه‌ جگە لەوەی تەبرێز دەمرێنێت، كاریگه‌ری نه‌رێنی ده‌كاته‌ سه‌ر دانیشتوانی ناوچەکە، كه‌ ژیان و گوزه‌رانیان له‌سه‌ر كشتوكاڵ و ئاژه‌ڵدارییه، بۆیە پێویستە ھەرچی لەدەست دەێت بکرێت تا ڕێ بگیرێت لە وشکبوونی تەواوی دەریاچەکە.

ده‌ریاچه‌ی ورمێ پێش بچوکبوونەوە بە دووه‌م گه‌وره‌ترین ده‌ریاچه‌ی سوێر له‌ جیهان ھەژمار دەکرا، ئەو دەریاچەیە ده‌كه‌وێته‌ نێوان پارێزگاکانی ئازه‌ربایجانی خۆرئاوا و ئازه‌ربایجانی خۆرهه‌ڵات، پێش دەستپێک وشكبوونەکەی، ڕووبه‌ری ده‌ریاچه‌كه‌ ٥ هه‌زار و ٢٠٠ كیلۆمه‌تر چوارگۆشه‌ بوو، لە ئێستاشدا تەنھا نزیکی ٢٠٪ ـی ڕووبەرەکەی ئاوی تیا ماوە و نزیک بە شاری ورمێیە لە رۆژھەڵاتی کوردستان.

شاری تەبرێزیش دوای تاران و مەشھەد سێیەمین گەورەترین شاری ئێرانە و بەپێی داتای ساڵی ٢٠١٦، دانیشتووانی شارەکە نزیک بە ٢ ملیۆن و ٥٠٠ ھەزار کەسە، زۆرینەی دانیشتووانەکەشی تورکی ئازەرین، کوردیش بە پلەی دووەم دێن لە شارەکە.

ئەم وێنەیەش قەبارەی دەریاچەکە پیشاندەدات لە نێوان ساڵانی ٢٠٠٠ تا ٢٠١٤

بەردەوام بە لە خوێندنەوە
ریکلام
ریکلام
ریکلام

کوردستان

دوایین