گەشتە ئاسمانییەكان لە ئاسمانی ئەمریكادا مەحاڵ بوون، لانیكەم تا كاتژمێر دووی پاشنیوەڕۆی دوێنێ لە ئەنجامی تێكچوونی سیستمی تەكنیكی.
وردە وردە زانیارییەكان دەستیانكرد بە دزەكردن سەبارەت بەو هەڵە تەكنیكییەی لە سیستەمی یارمەتیدانی فڕۆكەوانەكان لە ئەمریكا ڕوویداوە، بەبێ ئەویش فڕین مەحاڵ دەبێت.
ئامارەكان سەرەتا ئاماژەیان بەوە كردووە كە 700 گەشتی ئاسمانی ڕاگیراون، دواتر ژمارەكە بەرزبووەوە و لەماوەی كەمتر لە كاتژمێرێكدا ژمارەكە گەیشتە زیاتر لە دوو هەزار و 500 گەشت و زۆربەی ئەو گەشتانە دواخران، هاوكات 141 گەشت هەڵوەشانەوە، پێشبینیش دەكرێت كە ئەم ژمارانە بەرزتر ببنەوە.
ئیدارەی فڕۆكەوانی فیدراڵی ئەمەریكا ئاشكرایكرد، ئەو بابەتە بەهۆی كەموكوڕییەكی تەكنیكی لە سیستەمی (NOTAM)دا بووە، كە كاردەكات بۆ ئاگاداركردنەوەی فڕۆكەوانان لە مەترسییەكان لە سەرتاسەری ڕێڕەوی فڕینەكەدا.
ماڵپەڕی ئیدارەی فڕۆكەوانی فیدراڵی ئەمریكا وردەكارییەكانی ئەم سیستەمە ڕوون دەكاتەوە و دەڵێت: “زانیاری سەرەتایی بۆ ئەو كارمەندانەی بەشدارن لە گەشتەكاندا لەخۆدەگرێت، بەو پێیەی بارودۆخی نائاسایی لە ئاسمانی ئەمریكادا نیشان دەدات، هەروەها بارودۆخی ئاساییش”.
سیستمەكە بریتییە لە:
نوێكردنەوەی ڕاستەوخۆی بارودۆخی ئاسایی و نائاسایی ئاسمانی ئەمریكا.
زانیاری لەسەر هەر گۆڕانكارییەك لە ئاسانكاری و خزمەتگوزاری و ڕێكار و مەترسی لە ئاسمانی ئەمریكادا.
سیستەمەكە، زمانێكی تایبەت بەكاردەهێنێت كە پەیوەندیكردن كاریگەرتر دەكات.
ئیدارەی فڕۆكەوانی ئەمریكا دوو جۆری ئەم سیستەمەی هەیە، یەكێكیان بۆ فڕۆكەوانەكان و ئەوی دیكەیان بۆ فڕۆكەخانەكانە و پێكەوە كاردەكەن بۆ دەستنیشانكردنی كێشە هاوبەشەكان و باشترین پراكتیزە لەم بوارەدا.
بۆ نموونە، فڕۆكەوان دەبێت ٢٥ میلی دەریایی لە هەر لایەكی تەواوی ڕێڕەوی فڕینەكە سەیربكات، بۆ ئەوەی دڵنیابێت لە بینینی تەواوی هەموو ئەو فڕۆكانەی كە لەو ناوچەیەدا دەفڕن.
ئەمەش بەو مانایەیە كە لە نەبوونی یان تێكچوونی ئەم سیستەمەدا، فڕۆكەوان ناتوانێت ئەو مەترسیانە دەستنیشان بكات كە ڕەنگە لە دەوروبەری بێت.
