كۆمسیۆنی باڵای سەربەخۆی هەڵبژاردنەكانی عێراق ئاشكرای دەكات، سبه‌ینێ له‌گه‌ڵ كۆتایی ده‌وامی فه‌رمیدا ده‌رگای تۆماركردنی ناوی هاوپه‌یمانێتی و حزب و كاندیده‌كان بۆ هەڵبژاردنی پەرلەمانی كوردستان دادەخرێت و دەشڵێت: “پارتی ئاره‌زووی خۆی بۆ به‌شداریكردن له هه‌ڵبژاردن نیشانداوە”.
جومانه غەلای، وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عێراق لە بەیاننامەیەكدا ئاماژەی بەوەكردووە، پارتی دیموكراتی كوردستان له فه‌رمانگه‌ی كاروباری حزب و ڕێكخراوه سیاسییه‌كان، ئاره‌زووی خۆی بۆ به‌شداریكردن له هه‌ڵبژاردنی په‌رله‌مانی كوردستان نیشانداوه.
ڕاشیگەیاندووە، سبه‌ینێ له‌گه‌ڵ كۆتایی ده‌وامی فه‌رمیدا ده‌رگای تۆماركردنی ناوی هاوپه‌یمانێتی و حزب و كاندیده تاكه كه‌سییه‌كان بۆ هه‌ڵبژاردنی په‌رله‌مانی كوردستان داده‌خرێت.
ئاماژەی بەوەشكردووە، هه‌موو لایه‌نه یاسایی و كارگێڕیی و دارایی و هونه‌رییه‌كان بۆ هه‌ڵبژاردنی په‌رله‌مانی كوردستان ئاماده‌كراون.
جەختیشی كردۆتەوە، كۆمسیۆن به ته‌نیا لایه‌نی هونه‌رییه و په‌یوه‌ندی به لایه‌نی سیاسیی نییه و ئه‌وه‌ی له‌ڕووی یاسا و پابه‌ندیی و بڕیاره‌كانی ده‌سته‌ی دادوه‌ریی هه‌ڵبژاردنه‌كانه‌وه له‌سه‌ریه‌تی، جێبه‌جێیان ده‌كات.
