وەزارەتی دارایی عێراق بڕیاری خەرج كردنی پارەی مووچەی خانەنشینانی دەركرد و ڕایگەیاند، بانكەكان پارەدار دەكەن بۆ خەرج كردنی مووچە.
فەرمانگەی ژمێریاری وەزارەتی دارایی عێراق لە بەیاننامەیەكدا ئاماژەی بەوەكردووە، بڕیاریان داوە بە پارەداركردن و خەرج كردنی مووچەی خانەنشینانی شارستانی و سەربازی بۆ مانگی حوزەیران.
ڕاشیگەیاندووە، ڕێكارەكانی پارەداركردنی مووچە تەواو دەكرێت لەلایەن دەستەی خانەنشینی نیشتمانییەوە لەڕێگەی بانكەكانی ڕافیدەین و ڕەشید و خەرج كردنی لەڕێگەی پارەدانی ئەلیكترۆنی تایبەتەوە.
جەختیشی كردۆتەوە، سەرجەم خانەنشینانی شارستانی و سەربازی دوای ئەوەی نامە بۆ مۆبایلەكانیان دێت، دەتوانن سەردانی لقی بانكەكان یان دەروازەكانی فرۆشتنی ئەلیكترۆنی لە بەغدا و پارێزگاكان بكەن بۆ وەرگرتنی مووچەكانیان.
ئەمە لەكاتێكدایە، كە ئەمڕۆ یەك شەممە، هەردوو بانكی ڕافیدەین و ڕەشیدی عێراق دەستكردن بە دابەشكردنی مووچەی خانەنشینان (شارستانی و سەربازی) بۆ مانگی 6 ڕادەگەیەنن.
