ئەندامێکی ئەنجومەنی نوێنەرانی عێراق ڕایگەیاند، لە ڕێگەی تیمێکەوە پشکنینی زانستی بۆ گۆڕەبەکۆمەڵەکان ئەجامدراوە، دەرکەوتووە کە زۆربەی قوربانیەکان ژن و مناڵن.
کاروان یاروەیس، ئەندامی ئەنجومەنی نوێنەرانی عێراق ڕایگەیاند، سەبارەت بە نیگەرانی کەسوکاری سەربەرزی ئەنفالکراوان لەبارەی تێکدان و دەستکاری کردنی گۆڕەبەکۆمەڵەکانی جینۆسایدی ئەنفال لە ناوچەی تەلشێخی سەماوە، لەگەڵ د.زییا ئەلساعدی بەرێوەبەری گشتی گۆڕەبەکۆمەڵەکان بەدواداچوونمان کرد، ڕۆژی ١٢ی ئەم مانگە تیمێکی بەرێوەبەرایەتی گۆڕەبەکۆمەڵەکان چوونەتە تەلشێخ و پشکنینی زانستی سەرەتاییان ئەنجامداوە و بەدواداچوونیان کردووە و بەهۆی گەرماوە تیمەکان نەیانتوانیوە بەردەوام بن.
ئاماژەی بەوەکرد، بەپێی پشکنینی سەرەتایی ئەو دوو گۆڕەبەکۆمەڵە زۆربەی قوربانیەکان ژن و مناڵن، تا ئێستا لەو ناوچەیە چوار گۆڕی بەکۆمەڵی جینۆسایدی ئەنفالی تێدایە، گۆڕێکیان لەلایەن ئەمریکیەکان لە ٢٠٠٤ و گۆڕێکی تریان کە ١٧١ روفاتی تێدابووە، لەلایەن تیمی گۆڕەبەکۆمەڵەکانی عێراقەوە لە ٢٠١٩ کراوەتەوە و دوو گۆڕی تری بە کۆمەڵ ماون تەنها پشکنینی سەرەتاییان بۆکراوە.
جەختمان کردەوە، پێویستە گۆڕەبەکۆمەڵەکان بپارێزرێن و بەپێی یاسای پاراستنی گۆڕەبەکۆمەڵەکان ڕێوشوێنی پێویست بگیرێتەبەر.
