پەرلەمانتارێكی كورد ڕایدەگەیەنێت، بڕیارەکانی دادگای فیدڕاڵی بۆ مووچە هێندە بێهێزنین وەزیرێک بتوانێ جێبەجێی کردنی ڕابگرێ و دەشڵێت: “بانكی (تی بی ئای) مووچەی سەرۆكایەتییەكانی و پلەتایبەتەكانی لایە و لە زۆربەی وڵاتان كارتەكەی بەكاردەهێنرێت”.
کاروان یاروەیس، ئەندامی پەرلەمانی عێراق لە فراكسیۆنی یەكێتی ڕایگەیاندووە، بڕیاری دادگای باڵای فیدراڵییە مووچەی خەڵکی هەرێمی کوردستان مانگانە لە بەغداوە دێ و پێویست ناکا خەڵک نیگەران بکەن.
سەبارەت بە دەنگۆی ڕاگرتنی مووچە لەلایەن وەزیری دارایی عێراقەوە، یاروەیس دەڵێت: “بڕیارەکانی دادگا هێندە بێهێزنین وەزیرێک بتوانێ جێبەجێی کردنی ڕابگرێ”.
ڕوونیشی كردۆتەوە، هەردوو وەزارەتی دارایی هەرێم و فیدراڵی نزیکن لە چارەسەری هەژماری بانکی و تەوتین، بەڵام نووسراوەکەی حکومەتی هەرێم ڕوون نییە ئایا بانکی TBIوەک بانکەکانی تر بەشدار دەبێ لە تەوتین یاخود حەسریەن خۆی بەتەنها پڕۆسەکە دەکات.
ئاماژەی بەوەشكردووە، ئەم بانکە متمانە پێیکراوە، مووچەی زۆربەی سەرۆکایەتیەکان و پلە تایبەتەکان و دامەزراوە گرنگەکانی عێراق لای ئەوان تەوتین کراوە بە پەرلەمانی عێراقیشەوە، لەزۆربەی وڵاتان کارتەکەی دەتوانرێ بەکاربهێنرێ و بانکێکی فیدراڵییە.
