ژمارەیەک سیناتۆر و ئەندامانی ئەنجوومەنی نوێنەرانی ئەمریکا نامەیەک ئاڕاستەی جۆ بایدن، سەرۆکی ئەمریکا دەکەن و داوا دەکەن، بایدن داوای دەستبەجێ دەستپێکردنی هەناردەی نەوتی هەرێمی کوردستان و ناردنی شایستە داراییەکانی هەرێمی کوردستان لەلایەن بەغداوە بکات.
ڕۆژی هەینی، 22-3-2024، کۆشکی سپی لە ڕاگەیەندراوێکدا بڵاویکردەوە، ڕۆژی 15-4-2024 جۆ بایدن، سەرۆکی ئەمریکا لە کۆشکی سپی پێشوازی لە محەمەد شیاع سودانی، سەرۆک وەزیرانی عێراق دەکات.
ڕۆژی 28ـی ئاداری 2024، هەشت کۆنگرێسمانی ئەمریکا (چوار ئەندامی ئەنجوومەنی نوێنەران و چوار ئەندامی ئەنجوومی پیران) نامەیەکیان ئاڕاستەی جۆ بایدن، سەرۆکی ئەمریکا کرد و تیایدا نیگەرانیی خۆیان لەبارەی میوانداریکردنی سودانی لە ئەمریکا دەربڕیوە و دەڵێن، “حکومەتی عێراق بەشێوەیەکی چالاکانە لەگەڵ تاران دژی هاوپەیمانە کوردەکانمان کار دەکات”.
لە نامەکەیاندا، کۆنگرێسمانەکان دەڵێن: “حکومەتی عێراق لەژێر کاریگەرییەکی بەرچاوی ئێراندایە و ساڵانە نزیکەی سێ ملیار دۆلار بۆ هێزەکانی حەشدی شەعبی و گرووپە میلیشیاکان کە هێزی پاڵپشتیکراوی ئێرانن خەرج دەکات. ئەو گرووپە میلیشیایانە لە حەوتی ئۆکتۆبەری پارەوە زیاتر لە 180 جار هێرشیان کردووەتە سەر هێزەکانی ئەمریکا و هەرێمی کوردستان.”
ئەو كۆنگرێسمانانە دەڵێن: “حکومەتی عێراق بەشێوەیەکی چالاکانە لەگەڵ تاران دژی هاوپەیمانە کوردەکانمان کار دەکات، لەنێویاندا بڕینی هاوکارییە داراییەکانی حکومەت و داخستنی بۆریی نەوتی عێراق – تورکیا، کە بەشێکی زۆری ئابووریی کوردستانی لەسەر بەندە”.
ئاماژە بەوەشكراوە، “وەک پێشمەرجێک بۆ هەر سەردانێکی محەمەد شیاع سودانی، پێویستە داوا بکەن کە دەستبەجێ بۆریی نەوتی عێراق – تورکیا بکرێتەوە بۆ ئەوەی هەرێمی کوردستان بتوانێت دەست بە هەناردەکردنی نەوت بکاتەوە” و جەختیشكراوەتەوە لەسەر ناردنی شایستە داراییەکانی هەرێمی کوردستانە لەلایەن حکومەتی عێراقەوە.
لە نامەکەدا داوا لە بایدن کراوە، “پێویستە داوا لە حکومەتی عێراق بکەیت، کە دەستبکاتەوە بە ناردنی شایستە داراییەکانی هەرێمی کوردستان و ڕێگە بە فرۆشتنی دەستبەجێی نەوتی خاوی کوردستان بدرێت”.
