بەرەبەیانی ئەمڕۆ هەینی 29ی ئادار، فڕۆکەکانی ئیسرائیل هێرشێكی چڕیان كردە سەر کۆگای چەک و تەقەمەنیی لە نزیک فڕۆکەخانەی حەلەب، بەهۆیەوە 36 کەس کوژراون و دەیانی دیکەش بریندار بوون.
ڕوانگەی سوری بۆ مافەكانی مرۆڤ بڵاویكردۆتەوە، هێرشەکان لە دەورووبەری فڕۆکەخانەی نێودەوڵەتیی حەلەب بووە و 36 کەس لە هێزەكانی حكومەتی سوریا كوژراون و چەندین كەسی دیكە بریندارن.
هەر بەپێی ڕاپۆرتی ڕوانگەكە، هێزی بەرگریی ئاسمانیی سوریا هەوڵی بەرپەرچدانەوەی هێرشەکەیان داوەتەوە و بۆردومانەکە لە باشورەوە بووە و ناوچەکانی سەفیرە و خەناسر بەئامانج گیراون.
ڕوونیشی كردۆتەوە، ژمارەی کوژراوانی سوریا لەم هێرشەدا لە هێرشەکانی ئیسرائیلدا زۆرترینە و پێشتر ئەو ژمارە کوژراوە لە بۆردومانەکانی ئیسرائیلدا وێنەی نەبووە.
