بەڕێوەبەرایەتی کۆمەڵگای دەروازەی مەرزی نێودەوڵەتی باشماخ هاووڵاتیان و گەشتیاران ئاگادار دەکاتەوە، هاتووچۆ ڕاناگیرێت و دەتوانن گەشت بکەن.
لە بڵاوکراوەیەکدا بەڕێوەبەرایەتی کۆمەڵگای دەروازەی مەرزی نێودەوڵەتی باشماخ، ئاماژە بەوەدەکات، لەلایەن وەزارەتی ناوخۆی کۆماری ئیسلامی ئێرانەوە ئاگادارکراینەوە کە ئەو بڕیارەی پێشوو بۆ راگرتنی هاتووچۆی هاووڵاتیان و گەشتیاران هەڵپەسێردراوە و دەروازەکە کراوە دەبێت،
ئاماژەی بەوەشداوە، سەرجەم هاووڵاتیان و گەشتیاران لە ڕۆژانی هەڵبژرادنەکانی کۆماری ئیسلامی ئێراندا دەتوانن گەشت و هاتووچۆی خۆیان ئەنجام بدەن.
پیشتر کۆماری ئیسلامی ئێران ، دەروازەی نێودەوڵەتی باشماخی ئاگادار کردبووەوە، بەهۆی بەڕێوەچوونی هەڵبژاردن لە ئێران بۆ ماوەی دوو ڕۆژ هاتووچۆی گەشتیاران و هاووڵاتیان ڕادەگیرێت، و تەنها هاتووچۆی بازرگانی دەکرێت، دواتر لەلایەن وەزارەتی ناوخۆی ئێرانەوە ئەو بڕیارە هەڵپەسێردرا و هاتووچۆ ئاسایی دەبێت لە ڕۆژانی هەڵبژاردندا.
