وەزیری ناوخۆی حكومەتی هەرێمی كوردستان لە میانی کردنەوەی پێشانگای نێودەوڵەتی ئۆتۆمبیل لە هەولێر سەبارەت بە بڕیارەکانی دادگای فیدڕاڵی بۆ ڕۆژنامەنووسان وتی، “تا ئێستا دیار نییە کە بڕیارەکانی دادگای فیدڕاڵی بە چ شێوازێک جێبەجێ دەکرێن”.
ڕێبەر ئەحمەد، وەزیری ناوخۆی حكومەتی هەرێمی كوردستان لە لێدوانێکی ڕۆژنامەوانیدا سەبارەت بە بڕیارەکانی دادگای فیدڕاڵی و ئاسانکارییەکانی حکومەتی هەرێم بۆ هاتنی دیوانی چاودێری دارایی عێراق بۆ وردبینیکردن لە خەرجی و داهاتەکان ڕایگەیاند، “هەموو ئاسانکارییەک کراوە بۆ دیوانی چاودێری دارایی عێراق، هەرچی پێویست بووە وەزارەتی دارایی هەرێم کردوویەتی لە هاوکاری و هەماهەنگی کردن”.
دادگای فیدڕاڵی عێراق بۆ یەکلاییکردنەوەی پرسی مووچەی مووچەخۆرانی هەرێم بڕیاری دا بە دابەشکردنی مووچەی مووچەخۆرانی هەرێم لەلایەن بانکە فیدڕاڵییەکان، لە ڕێگەی کردنەوە هەژمار و دروستکردنی کارتی بانکی لەلایەن بانکی حکومییەکانی عێراق.
لەبارەی پڕۆژەی “هەژماری من”ەوە وەزیری ناوخۆ ڕایگەیاند، هێشتا زووە قسە لەسەر پڕۆژە و چارەنووسی “هەژماری من” بکرێت، هێشتا خەڵک تێنەگەیشتووە لەوەی بڕیارەکانی دادگای فیدڕاڵی عێراق بە چ شێوازێک جێبەجێ دەکرێن، ئەمەش پێویستی بە گفتوگۆکردن و لێکتێگەیشتنی وەزارەتی دارایی هەرێم و بەغدایە بۆئەوەی بگەنە ڕێکاریکی دروست کە لەگەڵ دەستوور و یاساکان بگونجێت، کە تایبەتمەندی هەرێمی کوردستان ڕەچاوبکرێت، چونکە هەرێمی کوردستان دەستووری و یاساییە.
ئەمەش لە کاتێکدایە ڕۆژی 21/2/2024 دادگای فیدڕاڵی عێراق بڕیاری دا بە گواستنه‌وه‌ی مووچه‌ی مووچه‌خۆرانی هه‌رێم بۆ سەر بانكە فیدڕاڵییەكان، هەردوو حكومەتی هەرێم و عێراقی پابەند كرد بە ڕادەستكردنی لیستی مووچەخۆران و پێدانی مووچەی مانگانە بە مووچەخۆرانی هەرێم.
هاوکات تەیف سامی، وەزیری دارایی عێراق ڕایگەیاند لە مانگی ئادارەوە بە بێ کردنەوەی هەژماری بانکی لە بانکە فیدراڵییەکاندا، مووچە بۆ فەرمانبەرانی هەرێمی کوردستان نانێرێت.
