پارێزگاری هەولێر رایگەیاند، بەهۆی ئاگرەکەی ئەمشەوی بازاڕی لەنگەوە، ٢٠ کەس رەوانەی نەخۆشخانە کراون. دەشڵێت، تا ئێستا نازانرێت هۆکاری کەوتنەوەی ئاگرەکە چییە و هەر کەسێکیش کەمتەرخەم بووبێت سزای دەدەن.
ئومێد خۆشناو، پارێزگاری هەولێر سەردانی بازاڕی لەنگەی هەولێر کرد و بە رۆژنامەنووسانی راگەیاند، بەهۆی ئاگرەکەی بازاڕی لەنگەی هەولێر ٢٠ کەس تووشی تەنگەنەفەسی بوون و رەوانەی نەخۆشخانە کراون کە زۆربەیان کارمەندی بەرگری شارستانی بوون و ئێستاش تیمەکانی بەرگری شارستانی لە هەوڵی کۆنتڕۆڵکردنی ئاگرەکەدان و لیژنەی لێکۆڵینەوەش بۆ رووداوەکە پێکهێنراوە و هەر کەسێکیش هۆکاربووبێت بۆ کەوتنەوەی ئاگرەکە سزا دەدرێت.
هەروەها کاروان میراودەلی، وتەبێژی بەرگری شارستانی هەولێریش رایگەیاند، تاوەکو ئێستا هۆکاری کەوتنەوەی ئاگرەکە دیار نییە، بەڵام زیانی گیانی نەبووە و تاوەکو ئێستا ناشزانرێت زیانەکانی ئاگرەکە چی بووە.
.ئەمشەو ئاگر لە بازاڕی لەنگەی هەولێر کەوتەوە بەهۆیەوە ١٠ کۆڵانی بازاڕەکە سووتاوە و نزیکەی ٣٠٠ دوکانیش سوتان
