وەزیری تەندروستی هەرێمی کوردستان ڕایگەیاند، دەست بەسەر هەموو ئەو دەرمان و گژوگیایانەدا دەگرن کە لەنێو تۆڕە کۆمەڵایەتییەکاندا ڕێکلامی “دابەزاندنی کێش”یان بۆ دەکرێت.
ئەمڕۆ شەممە، بە ئامادەبوونی پسپۆران و بەرپرسانی تەندروستیی حکومەتی هەرێمی کوردستان و عێراق، کۆنگرەیەکی زانستی لەبارەی نەخۆشی قەڵەوی لە هەرێمی کوردستان و عێراق، هۆکار و چارەسەرییەکانی لە هەولێر بەڕێوەچوو.
سامان بەرزنجی، وەزیری تەندروستی هەرێم ڕایگەیاند، تکالە هاووڵاتییانی هەرێمی کوردستان دەکەم بڕوا بە پڕۆپاگەندەکانی تۆڕە کۆمەڵایەتییەکان نەکەن، ئەوانەی ڕیکلام بۆ هەندێک گژوگیا و دەرمانی کێش دابەزاندن دەکەن، چونکە هیچیان زانستی نین و بۆ بەکارهێنان سەلامەت نین، هاوکات دەستیشیان بەسەردا دەگیرێت.
وەزیری تەندروستی ئەوەشی خستەڕوو، قەڵەوی کێشەی هەموو تاكێکی کۆمەڵگەیە، بەڵام ئەو دەرمانانە زیانبەخشن و دەبێت بە ڕێنمایی پزیشکی بەکاربهێندرێت، نابێت هەر کەسێک لە خۆیەوە بەکاریان بهێنێت، چونکە زیان بە تەندروستییان دەگەیەنێت.
