وتەبێژی وەزارەتی پەروەردەی عێراق ڕایگەیاند، هەفتەی کۆتایی مانگی کانوونی دووەم کاتی تاقیکردنەوەکانی نیوەی ساڵ بۆ خوێندنی ساڵی ٢٠٢٣- ٢٠٢٤ دیاری دەکرێت.
ئەمڕۆ هەینی، کەریم سەید وتەبێژی وەزارەتی پەروەردەی عێراق ئاماژەی بەوەکرد، لە هەفتەی کۆتایی مانگی داهاتوودا کاتی تاقیکردنەوەکانی نیوەی ساڵ بۆ ساڵی خوێندنی ٢٠٢٣-٢٠٢٤ لە سەرجەم خوێندنگاکان دیاری دەکەن.
وتەبێژی وەزارەتی پەروەردەی عێراق هیوای سەرکەوتن و بەدەستهێنانی نمرەی بەرزی بۆ گشت خوێندکاران لە تاقیکردنەوەکانی نێوەی ساڵی وەرزی خوێندنی ٢٠٢٣ – ٢٠٢٤ خواست.
ئەوەش لەکاتێکدایە، بەهۆی دواکەوتنی مووچەوە مامۆستایانی سنووری پارێزگاکانی سلێمانی و هەڵەبجە و ئیدارە سەربەخۆکان بایکۆتی هۆڵەکانی خوێندنیان کردووە و خوێندنی حکومی بەشێوەی فەرمی دەستی پی نەکردووە بەڵکو لەگەڵ لێدانی زەنگی خوێندن و دەستپێکردنی پرۆسی خوءێندنی ئەمساڵ زەنگی بایکۆت لێدرا و تەنها مەرجی مامۆستایان پێدانی مووچەکانیانە لەکاتی خۆیدا بۆئەوەی دەوام دەستپێ بکەنەوە.
