بەیانی ئەمڕۆ، مامۆستایانی ناڕازی لە بەردەم پەروەردەی ڕۆژئاوا گردبوونەوەیەکی ناڕەزایەتییان ئەنجامدا و ڕایانگەیاند، ” ناگەڕێینەوە هۆڵەکانی خوێندن، بایکۆت بەردەوامە”.
وێڕای ئەوەی ئەمڕۆ کەشوهەوای شاری سلێمانی باراناوی بوو، بەڵام خۆپیشاندان و گردبوونەوەی مامۆستایان و وانەبێژان بە گڕ و تینێکی زیاترەوە بەردەوامی هەبوو، هاوکات مامۆستایان ڕێپێوانیان کرد.
دوێنێ لەلایەن بەڕێوەبەری پەروەردەی ڕۆژهەڵاتی شاری سلێمانی داوا لە مامۆستایانکرا بگەڕێنەوە هۆڵەکانی خوێندن، بەڵام مامۆستایانی ناڕازی بایکۆتیان دووپاتکردە و ڕایانگەیاند تا داواکارییەکانیان جێبەجێنەکرێت ناگەڕێنەوە هۆڵەکانی خوێندن.
خۆپیشاندان و ناڕەزایەتی مامۆستایان لە کاتێکدایە کە دوێنێ لە بازگەی چیمەن و داقوق زیاتر لە هەزار و ٥٠٠ مامۆستا ڕێگریان لێکرا بڕۆن بۆ بەغدا بەمەبەستی ئەنجامدانی خۆپیشاندان لە گۆڕەپانی تەحریر.
