وەزیری دارایی: كێشەی خەرجی و داھاتمان لەگەڵ بەغدا چارەسەر كرد


 

وەزیری دارایی و ئابووریی ھەرێمی كوردستان، رایگەیاند ”بەشێكی سەردانەكەمان بۆ بەغدا، تایبەت بوو بە داكۆكیكردن لە بەشە بوودجەی ھەرێم و ئەو كێشانەی كە پێشتر لەنێوان ھەولێر و بەغدا ھەبوون، ھەروەھا كێشەی میلاكی فەرمانبەران، بابەتی خەرجی و داھاتمان بەتەواوەتی چارەسەر كرد”.

دوای سەردانی شاندێكی حكوومەتی ھەرێمی كوردستان بۆ بەغدا و كۆبوونەوە لەگەڵ بەرپرسانی حكوومەتی فیدراڵی، ئەنجوومەنی وەزیرانی عێراق، بڕیاریدا بە ناردنی ٤٠٠ ملیار دینار وەكو پشكی ھەرێمی كوردستان بۆ مانگەكانی ١١ و ١٢ـی ساڵی ٢٠٢٢.

لەمبارەیەوە وەزیری دارایی و ئابووریی و ئەندامی شاندی حكوومەتی ھەرێمی كوردستان بۆ بەغدا، ئاوات شێخ جەناب لێداونێكدا بۆ ماڵپەڕی فەرمی حكوومەتی ھەرێمی كوردستانی راگەیاندووە كە پرسی نەوت، بوودجە و پشكی ھەرێم لە بەشە بوودجەی ٢٠٢٣ـی عێراق، لەو پرسانەن كە لە بەغدا لەگەڵ وەزارەت و لایەنە پەیوەندیدارەكانی حكوومەتی فیدراڵی گفتوگۆیان لەسەر كردووە و لەبارەی ناردنی پشكی ھەرێم وتی”وەزارەتی دارایی عێراق لە تەواوی ساڵی ٢٠٢٢دا، تەنھا دوو مانگ پارەی بۆ ھەرێمی كوردستان خەرجكردووە”.

وتیشی: ”بەشێكی سەردانەكەمان تایبەت بوو بە داكۆكیكردن لە بەشە بوودجەی ھەرێم، ئەو كێشانەی كە پێشتر لەنێوان ھەولێر و بەغداھەبوون، ھەروەھا كێشەی میلاكی فەرمانبەران، بابەتی خەرجی و داھاتمان بەتەواوەتی چارەسەر كرد”.

لەو سەردانەی شاندی حكوومەتی ھەرێمی كوردستان بۆ بەغدا، پرسێكی دیكە كە گفتوگۆی لەسەر كراوە، پرسی نەوتە، كە بووەتە كێشەیەكی ھەڵپەسێردراوی نێوان ھەولێر و بەغدا، ئاوات شێخ جەناب، ئاماژەی بەوەدا كە لە كۆبوونەوەكانیان لەگەڵ شاندی حكوومەتی فیدراڵی لە بەغدا گفتوگۆیان لەبارەی نەوتەوە كردووە و ھەنگاوی زۆر باشیان ناوە و تاڕادەیەك لێكتێگەیشتن لەنێوانیاندا ھەیە و گوتی: “كۆكبووین لەسەر ئەوەی كە لە چوارچێوەی دەستوور و رێككەوتنی سیاسی و بەرنامەی وەزاری حكوومەتی نوێی عێراق، چارەسەر بۆ ئەو پرسانە بدۆزینەوە”.

وەزیری دارایی و ئابووریی راشیگەیاندووە ”وەكو وەزارەتی دارایی و ئابووریی، بە فەرمی داوامان ئاراستەی وەزارەتی دارایی عێراق كردووە، بۆ خەرجكردنی پشكی ھەرێمی كوردستان و لە كۆبوونەوەمان لەگەڵ وەزیری دارایی عێراق و لیژنەی ئابووریش باسمان لەوە كردووە و بەڵێنیان پێداین، كە لە ئەنجوومەنی وەزیراندا پێشنیاری بكەن، دوای ھەوڵەكانی شاندەكەش، ئەنجوومەنی وەزیران بڕیاری دا كە پارەی دوو مانگی ھەرێم بۆ ھەرێمی كوردستان بنێرێت”.

وەزیری دارایی و ئابووری، ئاماژەی بەوەش كرد، ئەمجارە بەراورد بە جارەكانی دیكە، تاڕادەیەكی زۆر گەشبینترن و دەرئەنجامی گفتوگۆیەكان بە دڵی ھاووڵاتییان دەبن، ھەوڵی زۆریشیان داوە بابەتی بوودجە و پشكی فەرمانبەرانی ھەرێمی كوردستان مسۆگەر بكەن، بەشێوەیەك كە نەكەوێتە ناو كێشمەكێشی سیاسی و قۆزتنەوەی سیاسیش دژی ھەرێمی كوردستان بكرێت.

ئاوات شێخ جەناب لەبارەی كەشی كۆبوونەوەكانیش دەڵێت: “دەرئەنجامی كۆبوونەوەكان ئەرێنی بوون وەكو چۆن سێ رۆژە ئێمە بە ئەرێنی بینوویمانە”.

بەمەبەستی بەردەوامیدان بە كۆبوونەوە گفتوگۆكانی نێوان حكوومەتی ھەرێمی كوردستان و حكوومەتی فیدراڵی، رۆژی ١٠ی ئەم مانگە، شاندی حكوومەتی ھەرێمی كوردستان گەیشتە بەغدا.

شاندەكەی حكوومەتی ھەرێمی كوردستان دوای ئەنجامدانی زنجیرەیەك دیدار و كۆبوونەوە لەگەڵ وەزارەت و لایەنە پەیوەندارەكان لە حكوومەتی فیدراڵی كە سێ رۆژی خایاند، ئێوارەی دوێنێ سێشەممە گەڕایەوە ھەولێر.

واشنتۆن سیستمی مووشەکی پاتریۆت دەداتە کیێڤ
پێشت واشنتۆن سیستمی مووشەکی پاتریۆت دەداتە کیێڤ
مێسی جەنگاوەری ژمارە پێوانیەکان
دواتر مێسی جەنگاوەری ژمارە پێوانیەکان
پەیوەندیدار