سەرۆکی دەستەی خانەنشینی عێراق ڕایگەیاند، موچەی ٢٢ هەزار مووچەخۆری خانەنشینی دەبڕدرێت کە بە ساختە مامەڵەکانیان بۆکراوە و مووچەیان وەرگرتووە.
ماهر حسێن سەرۆکی دەستەی خانەنشینی عێراق بە ئاژانسی هەواڵی عێراقی ڕاگەیاندووە، یەکێک لە کارە لە پێشینەکانی دەستەکە هەماهەنگییە لەگەڵ دەستەی دەستپاکی و دیوانی چاودێری دارایی بۆ کۆنتڕۆڵکردنی ئەو حاڵەتانەی کە دەبنە هۆی زیادبوونی مووچەخۆری نادیار.
ئاماژەی بەوەشکرد، لە ماوەی ڕابردوودا لەرێی کارمەند و چەند دەسەڵاتدارێكەوە چەندان هاوڵاتی وەک مووچەخۆر لە لیستی خانەنشینان تۆمارکرابوون کە ژمارەیان ٢٢ هەزار هاوڵاتییە. وتیشی، لە ئێستادا لە لیستی مووچەخۆران دەرکراون و ئەمەش دەبێتە هۆی گەڕانەوەی ٨٠٠ ملیار دینار بۆ خەزێنەی وڵات.
ئەوەشی خستەڕوو، ئەمەش هاوکارێکی باشدەبێت لە بەڕێوەچوونی پرۆسەی زیادکردنی موچەی خانەنشینان کە بۆ هەر مووچەخۆرێک ١٠٠ هەزار دینار زیادکرابوو.
