حزبی شیوعی كوردستان ڕایدەگەیەنێت، پشتیوانی داوا ڕەواکانی مامۆستایان و وانەبێژان و سەرجەم مووچەخۆران و خانەنشینانی هەرێمین و دەشڵێت: “دواکەوتنی مووچەکانیان بەکارێکی ناڕەوا دەزانین”.
حزبی شیوعی كوردستان لە بەیاننامەیەكدا سەبارەت بە خۆپیشاندانی مامۆستایان و فەرمانبەران ڕایگەیاند، ” مانگێک زیاتر بەسەر یەکەمین زەنگی دەستپێکردنەوەی پڕۆسەی خوێندن لە هەرێمی کوردستان تێپەربووە و مامۆستایان وەک کۆڵەکەی سەرەکی بەردەوامبوونی ئەم پرۆسەیە، سەرەڕای پاشەکەوتی زۆرەملێ و لێبرینی ناڕەوای مووچەکانیان، سێ مانگی تەواوە مووچەیان وەرنەگرتووە و حکومەتی کاربەڕێکەری هەرێمیش نەیتوانیوە چارەسەری گرفتەکانی مامۆستایان و وانەبێژان بکات، هەرلەبەرئەوە بایکۆت و نەچوونەوە بۆ قوتابخانە و هۆڵەکانی خوێندن بەردەوامی هەیە”.
ڕاشیگەیاندووە، “ئێمە لە حزبی شیوعی کوردستان، پشتیوانی داواڕەواکانی مامۆستایان و وانەبێژان و سەرجەم مووچەخۆران و خانەنشینانی هەرێمین، دواکەوتنی مووچەکانیان بەکارێکی ناڕەوا دەزانین و داواکارین بەزووترین کات دەسەڵاتدارانی هەرێم و بەغدا هەوڵی دابینکردنی هەرسێ مووچەی دواکەوتوویان بدەن. بەتەنگ داخوازییەکانیانەوە بێن، تالەوە زیاتر قوتابیان لە خوێندن دواناکەون”.
ئەمڕۆ یەک شەممە 22ی تشرینی یه‌كه‌می 2023، جارێکی دیکە مامۆستایان و فەرمانبەران لە زۆربەی شار و شارۆچكەكانی هەرێم دەستیان بە خۆپیشاندان كردەوە و داوای پێدانی مووچەی 3 مانگی ڕابردوو لەگەڵ دەستپێكردنەوەی پلەبەرزكردنەوە و دامەزارندنی وانەبێژان دەكەن.
ئەمەش دوای ئەوە دێت، ڕۆژی پێنج شەممەی رابردوو، ئالان حەمەسەعید، وەزیری پەروەردەی حکومەتی هەرێم رایگەیاند، بە بڕیار دەبێت لە یەک شەممە 22ی مانگەوە مامۆستایان بچنەوە هۆڵەکانی خوێندن.
