موراد قەرەیلان فەرماندەی هێزەکانی پاراستنی گەل، کشانەوەی هێزەکانی پەکەکەی لە مەخمور دووپاتکردەوە کە پێشتر لەلایەن هەپەگەوە ڕاگەیەندرابوو.
موراد قەرەیلان لە پەیامێکدا لە ڕۆژی ١١ی ئەیلول تۆمار کراوە و ئەمڕۆ پێنجشەممە لە میدیای پەکەکە بڵاوکرایەوە، ڕایگەیاند تورکیا سەرباری هەموو هێرشەکانیش نەیتوانی بگاتە ئەنجام و لە ئێستا بەدواوەش ناتوانن سەربکەون.
فەرماندەی بڕیارگەی ناوەندی پاراستنی گەل موراد قەرەیلان ڕایگەیاند، “خەڵکی مەخمور لەناو دژواری و تەنگوچەڵەمەی گەورەدا بوونی خۆیان مسۆگەر کرد و بەهۆی ئەو هەڵوێستە شکۆمەندانەیان خەڵکی مەخمور لە پێگەی پەنابەرانی سیاسیدا، کەس ناتوانێت بە پاساوی جیاجیا ئەو ڕاستیە پەردەپۆش بکات”.
قەرەیلان ئەوەشی خستەڕوو کە هێزەکانیان لە مەخمور ئەرکی خۆیان تەواوکردووە و وتی، “ئێمە پاراستن و بەرگریی لەوێ رادەستی گەنجانیان دەکەین”.
تورکیا ناوبەناو بە پاساوی بە ئامانجگرتنی پەکەکە کەمپی پەنابەرانی باکووری کوردستان لە مەخمور بۆردومان دەکات و سەرەتای ئەم مانگەش مزگەوتێکی کەمپەکە بۆردومان کرا، بەڵام دژە تیرۆری کوردستان ڕایگەیاند لەو بۆردومانەدا کۆبوونەوەیەکی پەکەکە کراوەتە ئامانج.
