هێزی پاراستنی سنووری ئێران لە سنووری هەنگەژاڵی بانە لە پارێزگای سنەی رۆژهەڵاتی کوردستان تەقەی لە ژمارەیەک کۆڵبەر کرد و کۆڵبەرێک گیانی لەدەستدا.
بەپێی راپۆرتی تۆڕی مافی مرۆڤی کوردستان، شەوی ٢٩ ئەیلوول هێزەکانی پاراستنی سنووری ئێران، بێ ئەوەی کۆڵبەرەکان ئاگادار بکەنەوە، تەقەیان لێکردوون و بەو هۆیەوە کۆڵبەرێک بەناوی محەممەد خالیدی، خەڵکی گوندی چی چۆڕان سەر بە شاری بانە کوژراوە.
تۆری مافی مرۆڤی کوردستان ئاماژەی بەوەکردووە، لە ماوەی مانگی ڕابردوودا زیاتر لە ٦ کۆڵبەر لە ناوچە سنوورییەکانی نێوان بانە لە پارێزگای سنە، سەردەشت و چاڵدێران لە پارێزگای ورمێ بەهۆی تەقەی هێزەکانی ئێرانەوە گیانیان لەدەستداوە.
بەپێی راپۆرتی کۆڵبەرنیووز، لە شەش مانگی رابردوودا لە ناوچە سنوورییەکانی پارێزگاکانی سنە، کرماشان و ورمێ ١٣ کۆڵبەر بە هۆکار جیاواز گیانیان لەدەستداوە و ٧٢ کۆڵبەری دیکەش بریندار بوون.
