لە پارێزگای هەولێر بە ئامادەبوونی فەرمانگە پەیوەندیدارەكان، کۆبوونەوەیەکی تایبەت بە خۆپارێزی لە بڵاوبوونەوەی نەخۆشی کۆلێرا بەرێوەچوو، كە تیایدا چەند بڕیارێك دەركرا.
ئەمڕۆ دوو شەممە 25/9/2023 بەسەرپەشتی ئومێد خۆشناو، پارێزگاری هەولێر و بە ئامادەبوونی هێمن قادر و مەسعود کارەش، جێگرانی پارێزگار کۆبوونەوەیەکی تایبەت بە خۆپارێزی لە بڵاوبوونەوەی نەخۆشی کۆلێرا بەڕێوەچوو، كە تیایدا قائیمقامی ناوەندو بەرێوەبەری گشتی تەندروستی هەولێر و سەرۆکی شارەوانی هەولێر و بەرێوەبەری گشتی گەشتوگوزار و بەرێوەبەری ئاوی هەولێر و ئاوی دەورووبەر و نوێنەری کشتوکاڵ و ژینگە ئامادە بوون.
بەپێی ڕاگەیەنراوێكی پارێزگای هەولێر، ئومێد خۆشناو جەختی لەسەر ئەولەویەتی پاراستنی تەندروستی هاووڵاتیان کردەوە و ئەوەی دووپاتکردەوە، کە پێویستە لەسەر ڕۆشنایی ڕێنماییەکانی بەرێوبەرایەتی تەندورستی رێوشوێنی خۆپارێزی بگیرێتە بەر.
لەلایەن خۆیەوە، بەرێوەبەری گشتی تەندروستی هەولێر باسی لەسروشتی بڵاوبوونەوەی نەخۆشی کۆلێرا کرد و ئاماژەی بە هەنگاوەکانی خۆپارێزی و هۆشیاریەکان کرد.
هەر بەپێی ڕاگەیەنراوەكە، باس لە ستاندردەکانی پاک و خاوێنی خواردەمەنی و سەرچاوەکانی ئاو کرد، بۆ ئەوەش رێنمایی و چاودێریکردن و هۆشیارکردنەوەیان بە زەروور زانی.
هەر لەم چوارچێوەیەدا کۆمەڵێك بریاری پێویست وەرگیران لە گرنگترینیان:
_ چڕکردنەوەی هەڵمەتی هۆشیاری تەندورستی.
_ چاودێریکردنی پاك و خاوێنی بیرەکانی ئاو.
_تیمە هاوبەشەکانی قائیمقامیەت و تەندروستی سەردانی مەیدانی چێشتخانە و کافیتریاکان بکەن و رێنماییان پێشکەش بکەن .
_ جێبه‌جێكردنی رێنماییه ته‌ندورستییه‌كان له دامه‌زراوه‌كانی سه‌ر به ئه‌وقاف و قوتابخانه و زانكۆكان.
