مەکتەبی سیاسی یەکێتی لە کەرکوك داوای دادگاییکردنی ئەو کەسانە دەکات کە تەقەیان لە خۆیشاندەرانی کەرکوك کرد.
ئەمڕۆ یەکشەممە، مەکتەبی سیاسی یەکێتیی نیشتمانیی کوردستان لە کەرکوك، ڕایەگەندراوێکی سەبارەت بە خۆپیشاندان و گرژییەکانی دوێنێی کەرکوك بڵاوکردەوە و تێیدا هاتووە: “بەداخەوە دوای درووست بوونی گرژی و ئاڵۆزییەکانی ئێوارەی رۆژی ٢-٩-٢٠٢٣ لە شاری کەرکوک، ژمارەیەک هاووڵاتیی کورد شەهید بوون، و ژمارەیەکی دیکەشیان برینداربوون، بۆ ئەو رووداوە دڵتەزێن و نەخوازراوە پرسەو سەرەخۆشی لە خۆمان و کەسوکارو خانەوادەی سەربەرزی ئەو شەهیدانە دەکەین، هەروەک هیوای زوو چاکبوونەوەش بۆ بریندارەکان دەخوازین”.
ڕاشیگەیاند، “ئێمە لە یەکێتیی نیشتمانیی کوردستان داوا لە سەرۆک وەزیرانی عیراق و لایەنە پەیوەندیدارەکان دەکەین؛ بە زوویی ئەوانەی کە تەقەیان بە رووی خوپێشاندەراندا کردووە بە سزای خۆیان بگەن و رووبەڕووی یاسا بکرێنەوە”.
ئەم ڕاگەیەندراوەش دوای ئەوە هات کە لە کاتی خۆپیشاندانەکەی دوێنێی کەرکوكدا تەقە لە خۆپیشاندەرانی کورد کرا و بە هۆیەوە چوار هاووڵاتی گیانیان لەدەستدا.
خۆپیشاندانەکە دژی گرتنی ڕێگەی کەرکوك-هەولێر ئەنجام درا کە نزیکەی هەفتەیەك بوو ژمارەیەك عەرەب و تورکمانی سەر بە حەشدی شەعبی بۆ دەربڕینی ناڕەزایی بەرامبەر بە رادەستکردنەوەی بارەگایەکی پارتی ڕێگەکەیان داخستبوو.
درەنگانی شەوی ڕابردوو بە بڕیاری سەرۆك وەزیرانی عێراق ڕادەستکردنەوەی بارەگاکە بۆ کاتێکی نادیار دواخرا و عەرەب و تورکمانەکانیش لە ڕێگەکە کشانەوە، بەوەش ئەمڕۆ یەکشەممە، قەدەغەکردنی هاتوچۆ کۆتایی هات و ڕێگەکەش کرایەوە.
