نەتەوە یەکگرتووەکان بڵاویکردەوە بەهۆی جەنگی ڕووسیا-ئۆکرایناوە کە درێژەی هەیە، نۆ هەزار و ٥٠٠ کەس لە ئۆکراینا گیانیان لەدەستداوە.
لە ڕاگەیەندراوێکدا کە لە هەژماری تۆڕی کۆمەڵایەتی ئێکس (تویتەری پێشوو)ی نووسینگەی جنێڤی نەتەوە یەکگرتووەکاندا بڵاوکراوەتەوە، ئاماری گیانلەدەستدان، برینداربوون و ئاوارەبوونی بەهۆی جەنگی ڕووسیا-ئۆکراینا کە لە ٢٤ی شوباتی ٢٠٢٢ەوە تا ئێستا درێژەی هەیە خراوەتەڕوو.
لە بڵاوکراوەکەدا باس لەوە کراوە کە باجی جەنگەکە قوڕس بووە و، بەهۆی جەنگەکەوە لە ئۆکراینا نۆ هەزار و ٥٠٠ کەس گیانیان لەدەستداوە، زیاتر لە ١٧ هەزار کەسیش برینداربوون.
هەروەها لە بڵاوکراوەکەدا هاتووە: ”بەدڵنیاییەوە ئامارە ڕاستەقینەکان زیاترن. زیاتر لە شەش ملیۆن کەسی ئۆکراینی هەڵاتوون بۆ وڵاتانی دراوسێ. لە ناوخۆی وڵاتەکەشدا زیاتر لە پێنج ملیۆن کەس ئاوارە و دەربەدەربوون”.
