پاش ڕاگەیاندنی دەرفەتی دامەزراندن بۆ دەرچووانی دانەمەزراوی زانکۆ، ئێستا قەرەباڵغییەکی زۆر لە بەردەم بینای بەڕێوەبەرایەتی گشتی دەستەبەری کۆمەڵایەتی دروستبووە، خوێندکاران چاوەڕێی وەرگرتنی فۆڕمی دامەزراندن دەکەن.
وەزارەتی کار و کاروباری کۆمەڵایەتی ڕایگەیاند، دەرفەت بۆ دەرچووانی دانەمەزراوی زانکۆ دەڕەخسێنێت و کۆمەڵێک هەلی کار ڕادەگەیەنێت.
لە ڕاگەیەندراوەکەی وەزارەتدا هاتووە، هەلی کار بۆ دەرچووانی دانەمەزراوی هەڵگرانی بڕوانامەی بەکالۆریۆس بە شێوەی گرێبەست دەڕەخسێنن، بۆ ناونیشانی IT ، ژمێریاری، کارگێری، یاسایی، ئەندازیاری میکانیک، توێژەری کۆمەڵایەتی، زمانی ئینگلیزی، هەروەها دەرچووانی ( ئامادەیی ، ناوەندی، سەرەتایی) بۆ پیشەی شۆفێری.
ئێستا لیژنەیەکی تایبەت پێکهێنراوە بۆ دابەشکردنی فۆرم لە رۆژانی یەک شەممە و دوو شەممە ٢٨- ٢٧ی ئاب بە مەبەستی دامەزراندن بە شێوەی خاڵبەندی.
مەرجەکانی دامەزراندنی دەرچووان بە شێوەی خاڵبەندی
– پێویستە خوازیار تەمەنی لە نێوان 18-40 ساڵ بێت.
– پێویستە خوازیار دانیشتووی سلێمانی بێت.
– پێویستە خوازیار زانیاری ڕاست و دروست پێشکەش بکات و لە ئەگەری تۆمارکردنی زانیاری هەڵە و نادروست داواکاری دامەزراندنی رەت دەکرێتەوە.
– نابێت خوازیار مووچەخۆر بێت لە هیچ دامودەزگایەکی حکومی و کەرتی تایبەت.
پێویستییەکانی دامەزراندن
ئەو کەسانەی فۆرمی دامەزراندن پڕ دەکەنەوە پێویستە بەڵگەنامەکانی ( ئەصڵی و کۆپی کراو) لە ڕۆژی سەردانیکردن ئامادە بکات ( کارتی نیشتیمانی، کارتی زانیاری، پشتگیری موختاری گەڕەک، بڕوانامە یان پشتگیری دەرچوون).
دوای دابەش کردنی فۆرم لەو دورۆژەدا ، دەبێت لە ماوەی سێ رۆژدا فۆرمەکان بگەرێنرێتەوە ھەمان شوێن.
شوێنی دابەش کردنی فۆرم : کاتژمێر ٩ بەیانی، لە بەرێوەبەرایەتی کاری سلێمانی لە ناو بینای دەستەبەری (ضمان) سەروو بەریدەکە.
