پێشبینی دەکرێت ئەو شەپۆلە گەرمایەی هەرێمی کوردستان و عێراقی گرتووەتەوە لە هەندێک ناوچە تا ٥٢ پلەی سیلیزی بەرز ببێتەوە.
شەپۆلێکی بەتینی گەرما، عێراق و هەرێمی کوردستانی گرتووەتەوە و پێشبینی دەکرێت پلەکانی گەرما لە ناوچەکانی گەرمیان، هەڵەبجە و کەرکووک تا ٥٢ پلەی سیلیزی بەرز ببێتەوە.
مانگەکانی تەمووز و ئاب بە گەرمترین مانگەکانی ساڵ دادەنرێت بەڵام ئەمساڵ، وەک بەرپرسی راگەیاندنی وەزارەتی گواستنەوە و گەیاندنی حکوومەتی ھەرێمی کوردستان رایدەگەیەنێت، گەرماکەی ئەمساڵ بەراورد بە چەند ساڵی رابردوو، بێ وێنە بووە.
بەڕێوەبەری راگەیاندن و پەیوەندییەکان لە وەزارەتی گواستنەوە و گەیاندنی حکوومەتی ھەرێمی کوردستان، دیلان ڕەشاد عەبدوڵڵا وتی: “لە رۆژی دووشەممەی ڕابردووە شەپۆلێکی گەرما ڕووی لە ناوچەکە و ھەرێمی کوردستان کردووە، ئەو شەپۆلە گەرمایە جیاوازییەکەی ئەوەیە کە مەودا و کاریگەری زیاترە لەسەر ھەرێمی کوردستان و تا ١٠ ڕۆژیش بەردەوام دەبێت”.
بە گوتەی ئەو بەرپرسەی وەزارەتی گواستنەوە و گەیاندن، “پیشبینی دەکرێت پلەکانی گەرما لە ناوچەکانی گەرمیان و ھەڵەبجە و کەرکووک بگاتە ٥٠ بۆ ٥٢ پلە و لە پارێزگاکانی ھەولێر،سلێمانی و دھۆک لە ژێر ٥٠ پلەی سیلیزی دەبیت”.
دیلان ڕەشاد وتیشی: “پێشبینی ئەوەش دەکرێت لە ھەندێک ناوچەی عێراقیش ببێتە خۆڵبارین بەڵام کاریگەریی ئەو خۆڵبارینە لەسەر ھەرێمی کوردستان لاواز دەبێت”.
دیلان ڕەشاد وەک رێکارێکیش بۆ خۆپاراستن لە گەرما، وتی: “بەردەوام ئامۆژگاری دەدەینە ھاووڵاتییان کە لە کاتژمێرەکانی ١٢:٠٠ تا ٠٤:٠٠ی ئێوارە لە ماڵەوە دەرنەچن”.
