محەمەد بامۆکی و دانا دارا کە لە دۆسیەی ٢٥ دەفتەر دۆلارەکەی نێوان مەلا هەورامان گەچێنەیی و هاووڵاتییەکدا ناویان هێنرا، ڕوونکردنەوە دەدەن.
محەمەد بامۆکیى و دانا دارا لە ڕوونکردنەوەیەکی هاوبەشدا باس لەوە دەکەن، عەتای دارتاش کە هەورامان گەچێنەیی تۆمەتبار کردووە بەوەی ٢٥ دەفتەر دۆلاری خواردووە، هیچ بەڵگەیەکی سەلمێنەری نەبووە.
ڕاشیانگەیاند: “ئێمە پیاوەتیمانکرد و کاتمان بۆ تەرخانکرد و گوێمان بۆ گرت، ئەو نا جوامێرانە وەڵامى داینەوە تەنانەت چەکدارى بەکرێگرتووە و هەڵى کوتاوەتە سەر ماڵى مامۆستا محەمەد بامۆکی”.
دەقی ڕوونکردنەوەکە
پاش ناوھاتنی ئێمە لە کۆمەڵێک قسەی ئاشکرا لەلایەن کەسێک بەناوی (عەتای دارتاش) و لەسەر داوای ژمارەیەک دڵسۆز ئەم چەند دێڕە دەنوسین و پێشتریش کە پرسیاری زارەکیمان لێکراوە یان لێدوانمان ھەبووە ڕوونمان کردۆتەوە :
1- ئەو باسەی لە ووتەکانی ناوبراودا ھاتووە کێشەیەکی کۆنی نێوان مامۆستا ھەورامان و ناوبراو بووە ‘پێش نزیکەی ١٠ ساڵ’ە، پاش ئەوەی ناگەنە ئەنجام ڕووبەڕووی کۆمەڵ دەکرێتەوە و ئەو مامۆستایانەش لە سلێمانی ئێمە “مامۆستا محەمەد بامۆکی وەک شەرع زان و دانا دارا وەک یاسایی’ ڕایانسپاردین بە بینینیان و دیاریکردنی لایەنی خەتابار و ئەوەشمان پێوتن ئەگەر بە وتەکانی ئێمە قایل نین ئەوا پەنا بۆ تۆمارکردنی داوا لە دادگاکانی سلێمانی بەرن بۆ یەکلاکردنەوەی چونکە بڕیاری دادگا پابەند کارە.
2- لەکاتی بینینی ھەردولادا گوێبیستی بەڵگەی ناوبراو بووین کە تەنھا نووسینی دەستی “نێو دەفتەرێکی سی لاپەڕەیی بوو”، واتا نە گرێبەست و نە نوسین و نە وەسڵ و نە کڵێشەی بڕی پارە و قەرز لە ئارادا نەبوو، و لای ئێمەوە کۆتایی بە دیدارەکەیان ھات کە لەسەرەتای ساڵی ٢٠١٤ بوو.
3- ناوبراو ئەگەر ھەر بەڵگەیەکی نوسراو بۆ سەلماندنی ووتەکانی هەبوایە، پەنای بۆ دادگای تایبەتمەند دەبرد و سەرئێشەی بۆ ئێمەش دروست نەدەکرد و تەنانەت پاش چەندین ساڵ چەکدار بەکرێ دەگرێ و دەچێتە سەر ماڵی مامۆستا محەمەد بامۆکی و پێی وا دەبێت کە ناوبراو شاھیدە! و ئەم وتانەی دوێنێش ھەر لەو چوارچێوەیە بووە، وەک ھەمووانیش دەزانن یەکلاکردنەوەی کێشە دادگاکانە نەک میدیا و بەردەم شاشەکان.
4- کەواتە ھەموو ئەو وتانەی ناوبراو لە تۆمەتبارکردنی کۆمەڵی دادگەری و “مامۆستا محەمەد بامۆکی و دانا دارا” کە دەستکاری چەند لاپەڕەی نوسراوێک کرابێت لەکاتێکدا نوسین ھەر نەبووە، ناڕاست و ھەڵبەستراو و تەشھیرە و ناماقوڵی کردنە بە حەقی ئێمە کە پیاوەتی و کاتمان بۆ بینین و گوێ گرتن لێی تەرخان کردبوو، لەبەرامبەردا ئەم ناجوامێریەمان بینیەوە.
5- ناوھێنانەکەی ئێمە زۆر بە ناڕەوایانە و لە میدیاکانەوە ھەموو ڕوکنەکانی تاوانی تەشھیر و ناوزڕاندن لەخۆ دەگرێت و بەرپرسیاریەتی یاسایی دەخاتە ئەستۆی ناوبراو و ‘دانا دارا و مامۆستا محەمەد بامۆکیى و کۆمەڵی دادگەری’ش دەست واڵا دەکات بە تۆمارکردنی سکاڵای جەزائی، وە ڕاشی دەگەیەنین ھەرگیز گەردنی ناوبراو ئازا ناکەین.
6- لەکۆتایدا دوپاتی سوپاسی بەردەوام بۆ خودای میھرەبان و پاشان خزمان و ھاوڕێ و خۆشەویستان دەکەمەوە کە متمانەی باش و گومانی خێریان بە ئێمە دووپات کردەوە و لە میھرەبانی خودا دەپاڕیینەوە کە لەسەر ڕاستە شەقامی خۆی و سەرخستنی ڕاستی و مانەوە لەگەڵ ڕاستگۆیاندا بەردەواممان بکات.
د. محەمەد مەلا ساڵح بامۆکی
دانا دارا حسێن
