پڕۆژەی دروستکردنی سێ دەریاچە لە شاری ھەولێر ڕەوانەی سەرۆکایەتی ئەنجوومەنی وەزیران کراوە و بڕیارە ٢٠ پۆندی دیکەش دروست بکرێن.
ڕێبوار کاکەیی، بەڕێوەبەری ئاودێری ھەولێر بە ماڵپەڕی فەرمیی پارتی ڕاگەیاند: ساڵانی ڕابردوو پلانێک ھەبوو سێ دەریاچە لە شاری ھەولێر دروست بکرێن، ئێستاش پڕۆژەکە بەردەستە و پێیدا دەچینەوە بۆ جێبەجێکردن، چونکە پڕۆژەکە پێویستی بە پارەیەکی زۆر ھەیە.
ئەوەشی خستەڕوو کە پڕۆژەکە ڕەوانەی سەرۆکایەتی ئەنجوومەنی وەزیران کراوە تا بڕیاری لەسەر بدرێت و وەزارەتی دارایی و ئابووریش پارەی پێویست بۆ جێبەجێکردنی خەرج بکات.
بەڕێوەبەری ئاودێری پارێزگای ھەولێر وتیشی: پڕۆژەکە سێ دەریاچەی گەورە لە خۆ دەگرێت و بڕیارە ئاوی لە زێی گەورە یانیش لە بەستۆڕە بۆ دابین بکرێت، جێبەجێکردنی ئەو پڕۆژەیە کاریگەری زۆری دەبێت لەسەر ھەولێر.
ڕێبوار کاکەیی ڕوونی کردەوە: حکومەتی ھەرێمی کوردستان بڕیاری داوە زیاتر لە ٢٠ پۆندی دیکە لە سنووری ھەولێر جێبەجێ بکرێن و لەوانەش ٢١ پۆند بڕیاریان بۆ دەرچووە، حەوت پۆندی دیکەش پەسەندکراون و دەچنە بواری جێ بەجێکردن.
