سەرۆکی فەرمانگەی وردبینی سلێمانی روونکردنەوەیەکی لەسەر قسەکانی هێڤیدار ئەحمەد، جێگری سەرۆکی لیژنەی دارایی بڵاوکردووەتەوە و دەڵێت:”سەرجەم ئەو زانیارییانە ناڕاستن و ئێمە هیچ راپۆرتێکمان پێ نەداوە”.
نزار محەمەد ئەمین رەزا، سەرۆکی فەرمانگەی وردبینی سلێمانی لە روونکردنەوەیەکدا ئاماژەی بەوەکردووە و دەڵێت:”ئێمە وەک فەرمانگەی وردبینی سلێمانی، هەموو ئەو زانیاریانەی هێڤیدار ئەحمەدی پەرلەمانتاری پارتی بڵاویکردۆتەوە لەبارەی خەرجی و داهاتی سلێمانی و بەهەدەردانی دارایی، رەتدەکەینەوەو هیچ راپۆرتێکیشمان بە بەڕێزیان لەوبارەیەوە نەداوە”.
ئەمڕۆ چوارشەممە، هێڤیدار ئەحمەد، جێگری سەرۆكی لیژنەی دارایی پەرلەمانی كوردستان لە هەژماری خۆی لە فەیسبووك بابەتێکی بڵاوکردبووەوە و رایگەیاندبوو، هەموو مانگێ ٨٣٪ی مووچەی فەرمانبەرانی هەردوو پارێزگای سلێمانی و هەڵەبجە لە هەولێرەوە بە (كاش) دەڕواتە سلێمانی، كە دەكاتە ٢٨٧ ملیار دینار، تەنیا دەبێ ئیدارەی سلێمانی (١٧٪)ی باقییەكەی لە داهاتی ناوخۆی ئەو دوو پارێزگایە دابین بكات. دەڵێن (نییە)!
