حاکم قادر، ئەندامی ئەنجومەنی باڵای سیاسی و بەرژەوەندییەکانی یەکێتی، ڕایگەیاند، “سەركۆنەی موشەكبارانكردنی فرۆكەخانەی نێودەوڵەتی سلێمانی و ھەر كارێكی تێكدەرانەو دوژمنكارانە دەكەین بۆ سەر ھەرێمی كوردستان و گەلی كوردستان، كـە ببێتە ھۆی تێكچوونی باری ئارامی ھاووڵاتییانمان”.
ئەمڕۆ لە شاری سلێمانی حاکم قادر حەمەجان، ئەندامی ئەنجومەنی باڵای سیاسی و بەرژەوەندییەکانی یەکێتی، سەردانی كەنیسەكانی ماریوسفی کلدانی و مریه‌م العزراء كردو وو پیرۆزبایی جەژنی هەستانەوە “قیامە”ی لێکردن.
حاكم قادر ئاماژەی بۆ ئەوەشكرد، “به درێژایی مێژوو ھەرێمی كوردستان و سلێمانی بە تایبەت شوێنی پێكەوەژیان و ئاشتی و بۆچوونە جیاواز و ئاینه جیاوازەكان بووە و هه‌ر به‌وشێوه‌یه‌ش ده‌مێنێته‌وه، ھیچ كەس و لایەنێك ئەو مافەی نییە بیرو باوەڕی ئەوانی تر بسڕێتەوە، چونكە دەبێت لە پانتایی ئازادی رادەربڕیندا قەبارەی بیركردنەوەو پێكھاتەی ئەوان وەك مافێكی خۆیان ڕەچاو بكرێت.”
حاكم قادر جەختی کردەوە”كلدان و ئاشورییەكان ھاوبەشی ڕاستەقینەی دەستكەوتەكانی ھەرێم كوردستانن و مافی خۆیانە بەشداربن لە دەسەڵات و نوێنەری ڕاستەقینەی خۆیان ھەبێت.”
حاکم قادر وتیشی:”سەركۆنەی موشەك بارانكردنی فرۆكەخانەی نێودەوڵەتی سلێمانی و ھەر كارێكی تێكدەرانەو دوژمنكارانە دەكەین بۆسەر ھەرێمی كوردستان و گەلی كوردستان، كە ببێتە ھۆی تێكچوونی باری ئارامی ھاوڵاتیانمان، پێویست بوو وەك یەكێتی و پارتی لە بری هێرش بۆسەر یەکتر، بیرمان لە وەلانانی ناكۆكییەكانمان بکردایەتەوەو بە گیانێكی نەتەوەی و ستراتیژێكی نیشتیمانیانە بەرامبەر نەیارەكانمان بوەستاینایەتەوە کە هەموو هەوڵەکانیان چڕکردووەتەوە تا هەرێمی کوردستان لە قاڵب بدەن و لە ئایندەدا هەر نەیهڵێن.”
لەبارەی ناكۆكییەكانی یەكێتی و پارتییەوە حاكم قادر دووپاتیكردەووە، “پێویستە بۆ چارەسەركردنی كێشەو ناكۆكییەكانی نێوانمان ڕێگەی دانیشتن و گفتوگۆو دیالۆگ بگرینەبەر نەك كاروكاردانەوەمان ھەبێت بەرامبەر بە یەكتر، چونكە بە درێژە كێشانی ناكۆكیەكانمان لە كۆتایدا تەنھا گەلی كوردستان زەرەرمەندی یەكەم دەبێت.”
