دەستەی كەشناسیی عێراق پێشبینی هاتنەبەری شەپۆلێكی تری بارانبارین دەكات لە ناوچە جیاجیاكانی وڵات و دەڵێت”هێشتا لە وەرزی زستانداین”.
ئەمڕۆ دوو شەممە،ئاژانسی فەرمی (العراقیە) لە زاری عامر جابری بەڕێوەبەری ڕاگەیاندنی دەستەی كەشناسیی عێراقەوە بڵاویكردەوە”هێشتا لە عێراق لە وەرزی زستانداین و ئەوەی لە تۆڕە كۆمەڵایەتییەكانیش سەبارەت بە گۆڕانكاریی كەشوهەوا و وشكەساڵی بڵاو دەكرێتەوە، دوورە لە ڕاستییەوە”.
بە وتەی جابری”وەرزی بارانبارین هێشتا بەردەوامە و گۆڕانكاری لە پلەكانی گەرما لە نێوان نزمبوونەوە و بەرزبوونەوەدایە، ئەمەش بە حاڵەتێكی ئاسایی دادەنرێت”.
بەڕێوەبەری ڕاگەیاندنی دەستەی كەشناسیی عێراق دەڵێت”هێشتا زستان ماوە و گۆڕانكارییەكان بەردەوام دەبن، پێشبینیش دەكرێت باران لە ناوچە جیاجیاكاندا ببارێت”، پێشبینیش دەكات لە مانگی ئاداردا بارانبارین دەستپێبكاتەوە.
