حكومەتی هەرێمی كوردستان لەبارەی راپرسییەكەی رۆژنامەی سەباح كە باس لە خواستی خەڵكی هەرێم بۆ گەڕانەوە بۆسەر بەغدا دەكات رایدەگەیەنێت، هەرێم خاوەن قەوارەیەكی یاسایی و دەستوورییەو بەرهەمی خوێنی هەزاران شەهید و خۆڕاگری پێشمەرگە قارەمانەكانە .
فەرمانگەی میدیا و زانیاری حكومەتی هەرێمی كوردستان، لە راگەیەندراوێكدا وەڵامی ئەو راپرسییەی داوەتەوە، كە رۆژنامەی سەباح-ی میدیای فەرمی حكومەتی عیراق بڵاویكردووەتەوە، لەبارەی بێ هیوابوونی خەڵكی هەرێمی كوردستان لە دەسەڵاتی سیاسی هەرێم.
هاوكات لە ڕاگەیەنراوەكەدا هاتووە، هیچ دەسەڵاتێك توانای هەڵوەشاندنەوەی هەرێمی كوردستانی نییە و بە نووسینی ڕۆژنامەیەكی مایەپووچ هەڵناوەشێتەوە كە پارەیەكی زۆری لێ خەرج دەكرێ و كەسیش هەر نازانێ ماوە یان داخراوە!
دەقی راگەیەندراوەكە:
ئەمڕۆ ١٨ی شوباتی ٢٠٢٣، ڕۆژنامەی “الصباح”ی عێراقی ، نووسینكی بڵاوكردووەتەوە كە گوایا لە ڕاپرسییەكدا “خەڵك بێ هیوا بوون لە دەسەڵاتی سیاسیی هەرێم و خوازیاری گەڕانەوەن بۆ سەر بەغدا”.
ئەم سەنتەر و بەناو ڕاپرسییەی ڕۆژنامەكە پشتی پێ بەستووە، هیچ بنەمایەكی زانستی نییە و دوورە لە ڕاستییەوە، ئەگەر بەڕاستیش ڕۆژنامەی (الصباح ) و ئەوانەی لە پشتییەوەن باوەڕیان بە ڕاپرسییە، لە 25 ی سێپتەمبەری 2017 ، زۆرینەی هەرە زۆری خەڵكی كوردستان، لە گەورەترین ڕاپرسی و ڕیفراندۆمی جەماوەری و دەنگدانێكی ئازاددا، قسەی خۆیان كرد و دەنگیان بۆ جیابوونەوە دا، بەڵام دەسەڵاتتدارانی ئەوكاتی بەغدا، بە هێرشی سەربازی و بەكارهێنانی سوپا لە دژی خەڵكی كوردستان و گەمارۆدان، وەڵامی ڕیفراندۆم و ڕای خەڵكیان دایەوە.
خەڵكی پارێزگاكانی عێراق، خۆیان شایەدی دەدەن ، كە هەرێمی كوردستان لە ڕووی پێشكەوتن و ئاوەدانیی و خزمەتگوزارییەوە، بە چەندین ساڵ لە پێش ناوچەكانی دیكەی عێراقەوەیە ، ئیتر چۆن خۆزگە بەوە دەخوازن و داوا دەكەن بگەڕێنەوە سەر شوێنێك كە لە هەموو بوارەكاندا وێران و كاول بووە!
هەرێمی كوردستان، خاوەن قەوارەیەكی یاسایی و دەستوورییە و بەرهەمی خوێنی هەزاران شەهید و خۆڕاگری پێشمەرگە قارەمانەكانە و هیچ دەسەڵاتێك توانای هەڵوەشاندنەوەی هەرێمی كوردستانی نییە و بە نووسینی ڕۆژنامەیەكی مایەپووچ هەڵناوەشێتەوە كە پارەیەكی زۆری لێ خەرج دەكرێ و كەسیش هەر نازانێ ماوە یان داخراوە !
فەرمانگەی میدیا و زانیاری
١٨ی شووباتی ٢٠٢٣
