پێویستە كورد چەكی ئیسلام لە دەستی عەرەب و تورك و فارس بسەنێتەوە
دەمێكە وڵاتانی سەردەستی كوردستان لە عەرەب، فارس و تورك ئاینی ئیسلامییان وەك چەكێكی كاریگەر لە دژی گەلی كورد بەكارهێناوە، كاریگەرییەكەی بەجۆرێك بووە زۆرجار بەشێك لە كوردییشی خستووەتەبەرەكەی خۆیەوە، ئەوەش بەهۆكاری سادەیی تێگەیشتنی بەشێك لە ئایندارانی كورد و دووری زۆرینەی پارت و ڕەوتە سیاسییەكانی كورد لە ئاین بەتایبەت ئاینی ئیسلام.
دەوڵەتی عێراق لە ساڵی 1988 لەسەردەمی سەدام حوسێندا پرۆسەی ئەنفالی بەناوی سوورەتێكی قورئان لە دژی گەلی كورد لە باشووری كوردستان بەڕێوەبرد و 182 هەزار پیر و ژن و منداڵی بێتاوانی شەهیدكرد.
دەوڵەتی ئیسلامیی ئێران لەسەرەتای هاتنەسەر كار لە سەردەمی ڕووحوڵا خومەینی فەتوای دژی گەلی كورد لە ڕۆژهەڵاتی كوردستان دەركرد.
دەوڵەتی توركیا لەسەردەمی ڕەجەب تەیب ئەردۆغاندا زۆرجار بە ناوی ئاینەوە هێرشیكردووەتەسەر گەلی كورد، لەناو گەلی كوردیش بەتایبەت بەشێكى هاووڵاتیانی ئاینداری باشووری كوردستان و بەشێكی لایەنە سیاسییەكانیش لە ژێر كاریگەری ئایندا هاوسۆزی ڕەجەب تەیب ئەردۆغان بوون و تەنانەت گەیشتووەتە ئاستی دژایەتیكردنی باكوور و ڕۆژئاوای كوردستان لە بەرژەوەندی توركیا و بەوەش نەوەستاون، چاویان لە تاوانەكانی دەوڵەتی توركیا بەرامبەر گەلی كورد لە باشووری كوردستانیش پۆشیوە، پاساوی بوونی پەكەكەیان هێناوەتەوە.
لەسەر ئاستی مێژووییشدا بە ڕای بەشێك لە شارەزایانی مێژوو ئەو هەلەی لە دوای جەنگی یەكەمی جیهانەوە بۆ كورد لە باشووری كوردستان بەتایبەت لە سلێمانی دروستبوو بۆ بنیاتنانی دەوڵەتی خۆی بە پشتیوانی بەریتانیا هاوشێوەی زۆر نەتەوەی دیكەی ڕزگاربووی ژێر دەستی دەوڵەتی عوسمانی كە بوونە خاوەنی دەوڵەتی خۆیان، بەهۆی بەردەوامی پشتیوانی دەستڕۆیشتوانی كورد لەو كاتەدا بۆ دەوڵەتی عوسمانی لە ژێر كاریگەری ئایندا و بە ناوی ئەركی ئاینییەوە لە دەست درا.
ڕەخنەی ئەوەش لە شێح مەحمود سەركردەی دیاری ئەو سەردەمەی كورد گیراوە كە وەك پێویست بە دەم بەریتانییەكانەوە نەچووە، كە ئەوان خوازیاربوون دەسەڵاتێكی كوردی دروستبكەن، زیاتر مەیلی بە لای عوسمانییەكانەوە بووە، ئەوەش هۆكار بووە بۆ ئەوەی چی دیكە بەریتانیا لەو كاتەدا پشتیوانی كورد نەكات.
ئێستا لە ڕۆژهەڵاتی كوردستان مامۆستایانی ئاینی ڕۆڵێكی گرینگ و پێشەنگ دەبینن لە ناڕەزایەتییەكانی ژینا ئەمینیدا ئەوان لە پاڵ دروشمەكانی ژن ژیان ئازادیدا ڕۆڵی خۆیان لە بەرگری لە نەتەوەكەیان دەگێڕن و لەگەڵ دەسەڵاتدارانی ئێراندا ڕووبەڕووبوونەوە.
ئامەد شاهۆ ئەندامی ئەنجومەنی پارتی ژیانی ئازادی كوردستان پژاك لە چاوپێكەوتنێكدا لەگەڵ كەناڵی ئاریەن تیڤی نرخاندنی بۆ ڕۆڵی مامۆستایانی ئاینی ڕۆژهەڵاتی كوردستان كرد لە ناڕەزایەتییەكانی ئێستادا.
ئامەد شاهۆ دەڵێت”لەساڵی ٢٠١٣دا ئۆجالان لەسەر یەكێتی مامۆستایانی ئاینی كورد و دامەزراندنی بزووتنەوەیەكی ئیسلامی دیموكراتیك قسەیكردووە و داوایكردووە با كۆنگرەی ئیسلامی دیموكراتیك ببەستن، بانگەوازی ئەوەی كرد لەسەر بنەمای ئیسلامی دیموكراتیك رێكخستنی تایبەت دابمەزرێت، كوردان تا ئێستا شتێكی وایان بۆ خۆیان بونیادنەناوە و تەنیا بەشداری دامودەزگای دیكە بوون، كە هەركامەیان نوێنەرایەتی بیركردنەوەیەكی تایبەت بەخۆیان دەكەن”.
ڕاشیگەیاند “دەوڵەتی ئێران، زیاتر ئیسلامی سیاسی دەسەپێنێت، پێویستە ئەو چەكەی بەناوی ئیسلامەوە لەدژی كۆمەڵگە بەكار دەبردرێت لەدەستی دەوڵەت دەربهێنن، هەركەس دەبێت خۆی بەڕێوە ببات و ئیدارەدانی خۆی بگرێتە ئەستۆی خۆی، یەكێتی بەهێزی مامۆستایان بۆ ئەم قۆناغە زۆر گرنگە”.
ئاماژەی بەوەشكرد “ناڕەزایەتی مامۆستایانی ئاینی بەهێزبووە و لەپاڵ كۆمەڵگەكە و لەپشت داوا ڕەواكانی گەلن، دەبێت ئەو هەڵوێستانە بەهێزتر بكرێن، دەبێت هەموو گۆڕەپانەكان ببنە گۆڕەپانی ئایدۆلۆژی، هزری”.
ڕوونیشیكردەوە، ژمارەیەكی زۆر مزگەوتمان لە ڕۆژهەڵاتی كوردستان هەیە، ئەو مزگەوتانە لەلایەن دەسەڵاتەوە كراون بە شوێنی بێ ئیرادەكردنی مرۆڤایەتی ئێمە، دەبێـت ئەو مزگەوتانە لە ژێر دەستیان دەربهێنین، تێكۆشانێكی نوێ لەوێ دەستپێبكەین.
ماوەی نزیكەی چوار مانگ زیاترە خۆپیشاندان و ناڕەزایەتی ڕۆژهەڵاتی كوردستان و ئێرانی گرتووەتەوە، لە دوای كوژرانی ژینا ئەمینی كچە كوردی شاری سەقز لەلایە پۆلیسی ئێرشادەوە.
هەرچەندە سەرەتای ڕاپەڕینەكان وەك دژایەتی ئاین لێكدرایەوە و لای هەندێكیش وەك هەلێك قۆسترایەوە، بەڵام دواجار ناڕەزایەتییەكان بۆ گەلی كورد لە ڕۆژهەڵاتی كوردستان چوونە چوارچێوەیەكی نەتەوەییەوە.
ئەبووبەكر كاروانی نووسەر و ڕووناكبیر و سەركردەى پێشوو لە یەكگرتووی ئیسلامی كوردستان لە بابەتێكدا دەڵێت “كۆماری ئیسلامی ئێران هەراسانی لێبڕاوە و بەجۆرەھا شێوە ناڕەزایی خۆی گەیاندووەتە دەوڵەتی عێراق و ڕێكخراوە وەرزشییە پەیوەندیدارەكانی جیھان، لەسەر ئەوەی لە پاڵێوراوێتی جامی كەنداودا، كەنداو بەعەرەبی وەسفكراوە نەك بە فارسی، كۆماری ئیسلامی ئێران، پشتی ڕژێمی بەشار ئەسەدی گرتوو لە ڕووخان قووتاری كرد، لەكاتێكدا سیستمێكی عەلمانی توندڕەو بوو، ڕووسیای پەلكێشی سووریا كرد، پشتیوانی ئەرمینییا بوو دژ بە ئازربایجان، سەرە ڕای ئەوەی ئەرمەنەكان مەسیحی و ئازەرییەكان موسوڵمان و تەنانەت شیعە مەزهەبیشن، ھەموو ئەمەش بەپاساوی پاراستنی بەرژەوەندی دەوڵەتی ئێران و سیستمە سیاسییەكەی”.
كاروانی لەبارەی توركیاوە دەڵێت “سەرۆك كۆماری توركیا سەرەڕای دروشمە توندەكانی، فەرشی سووری بۆ پێشوازی كردن لە سەرۆكەكانی ئیسرائیل ڕادەخات، دەست دەنێتە نێودەستی سیسی و دام و دەزگاكانی ئیخوان لە وڵاتەكەی بێدەنگ و سنوردار دەكات، دەستیشی كردووە بەئاسایی كردنەوەی پەیوەندییەكانی وڵاتەكەی لەگەڵ ڕژێمەكەی ئەسەد بەھەموو ئەوسروشتەی لەگەڵ خۆی ھەڵگرتووەو ئەو تاوانانەی ئەنجامی داون، كاردەكات بۆ ئەنجامدانی كۆبوونەوە لەگەڵ بەشار خۆی، لەبەر ھیچ شتێك نا بەڵكو تەنھا لەبەرئەوەی وەزیرە ناوخۆكەی ناوی ناوە پێویستیەكانی پاراستنی ئاسایشی سنووری وڵاتەكەی و بەرژەوەندییەكانی دەوڵەت و خۆی و پارتەكەی و لەناوبردنی ھێزەكانی یەپەگەو سووریای دیموكرات”.
ئەبووبەكر كاروانی دەڵێت: هەموو ئەم نموونانەو چەندانی تریش ئاماژەن بەچەند ڕاستییەك لەوانە:
1 – دنیای نوێ و لەوانەش ناوچەكەی ئێمە، مۆدێلی دەوڵەتی نوێ، واتە دەوڵەت -نەتەوە حوكمی دەكات. ئەم دەوڵەتەش سروشتی تایبەت بەخۆی ھەیەو پێوەری بۆ ڕێكخستنی پەیوەندییەكانی و داڕشتنی سیاسەتەكانی بەرژەوەندییە.
٢- سیاسەت جەوھەرێكی نەگۆڕی ھەیە ئەویش بەرژەوەندیخوازی و دابەشكردنی دنیاو دەورو بەر بۆ دۆست دوژمن و بەكارھێنانی كایەو چالاكی و شتەكانی تر لەوانەش ئاین لە خزمەتی خۆیدا.
٣- ھەروەك (وزاح خنفر) بەڕێوەبەری پێشووی كەناڵی جەزیرەو ستراتیژوان دەڵێت: جەوھەری ململانێكان و لێرەشەوە دەستنیشان كەری بەرژەوەندییەكان، ئابووری و سیاسەت پێكی دەھێنن، دین و ئایدۆلۆژیا تەواوكەرن، واتە زیاتر ڕۆڵی ڕەوایەتی پێدان و سازدان دەگێڕن و لەخزمەت ستراتیژە ئابوری و سیاسییەكاندان. بۆیە نابێت بە پاساوو دروشم و ناولێنانە ڕوواڵەتیەكان بخڵەتێین و جەوھەری ڕاستەقینەی ململانێكان و ئامانجی جەنگەكانمان لێتێكبچێت.
دەشڵێت “ئیسلامخوازی كوردستانی دەبێت بێ ھیچ دوو دڵییەك لەسەنگەری داكۆكیكردن لە بەرژەوەندییەكانی كوردستان و گەلەكەیدا بێت ھەروەكو تیایدا بووە. ھەروەھا ئیسلامییەكانی كوردستان ھەر لەنیوەی دووەمی نەوەدەكانەوە بڕیارە ڕاستەكەیان دا كاتێك سەنگەری ئۆپۆزیسۆنی كوردییان لە عێراقدا ھەڵبژاردو كوردستانیبوونیان كردە پێناسەی ناسینەوەی ئاراستەی سیاسیان، بەتایبەتیش بەئاقاری ئەویدی ئیسلامیی شیعەو سووننە لەو كاتەدا, چونكە تاك و ھێزی ئیسلامی كوردستانی، دەبێت لەوە دڵنییا بێت، ئەگەر لە چوارچێوەی ستراتیژو بەرژەوەندیی نیشتیمانی و نەتەوەیی گەلەكەیدا نەبێت، بیەوێت یان نەیەوێت، ھەرناوێكی لێبنێت و ھەر پاساوێكی بۆ دابتاشێت، ڕاستەوخۆ یان ناڕاستەوخۆ، دەچێتە ناو بازنەی ستراتیژی دەوڵەتێكی نەتەوەیی و ھێزێكی ترەوە، با ئیسلامیش بێت، كە كار بۆ بەرژەوەندی گەل و وڵاتی خۆی دەكات و كەس كوڕی خۆی ناكات بەقوربانی كچی خەڵك”.
