ئێمە لە تۆرە کۆمەڵایەتیەکان

کوردستان

خاڵە پشکنینەکانی کەرکوک ڕێگری لە بردنی کتێبی کوردی دەکەن بۆ شارەکە

خەڵک-

ئەمڕۆ ژمارەیەک لە رۆشنبیران رۆژنامەنووسانی کەرکوک لەبارەی قەدەغەکردنی بردنی کتێبی کوردی بۆ شاری کەرکوک لە لایەن سوپا و پۆلیسی عیراقەوە، ڕاگەیەنراوێکیان بڵاوکردەوە.

رۆشنبیران رۆژنامەنووسانی کەرکوک لە ڕاگەیەنراوەکەیاندا کە لە کۆنگرەیەکی رۆژنامەوانیدا خۆێندیانەوە، داوا سەرۆکی کۆمار و سەرۆک پەرلەمان دەکەن، نەھێڵن ئەو سەرپێچییە بەسەر خاڵی گومرکییەکانی نێوان کەرکوک و ھەرێمی کوردستاندا بڕوات کە دەیەوێت ڕێگری بکات لەوەی کتێبی کوردی بگاتە کەرکوک.

لە ڕاگەیەنراوەکەدا ھاتووە: لە پاش ڕووداوەکانی ١٦ ئۆکتۆبەری ٢٠١٧ ــەوە، کەرکوک بە دۆخێکی تایبەتدا تێدەپەڕێت، لەو کاتەوە دەیان دیاردەی دوور لە شارستانێتی دژ بە خەڵکی کەرکوک جێبەجێ کراون.

ڕاگەیەنراوەکە ئاماژەی بەوە کردووە، ئەو خاڵی پشکنینانەی لە نێوان ھەرێمی کوردستان و کەرکوک دانراون، لەسەر ڕەوتی بەعس کارەکانیان ڕادەپەڕێنن، سەرانە و باجی زیادە بە شێوەی ھەڕەمەکی دەسەپێنن کە بەشێکی ناگەڕێننەوە بۆ خەزێنەی ئیتیحادی.

رۆشنبیران رۆژنامەنووسانی کەرکوک ئەوەشیان ڕاگەیاندووە: لە دواین ڕەفتاری ناشارستانیانەدا، ئەو خاڵە گومرکییانە، باجیان خستۆتە سەر ھێنانی کتێب و مەلزەمە کوردییەکان بۆ کەرکوک و سەرئێشە بۆ ئەوانە دروستدەکەن، ئەو کارە دەکەن، ئەم ڕێوشوێنە دژ بە کورد لە سەردەمی رژێمی بەعسی دیکتاتۆری پەیڕەو دەکرا، جگە لەوەش ئەو بڕیارە دژ بە دەستوری عیراقییە کە زمانی کوردی وەک زمانی عەرەبی لە عیراق بە ڕەسمی ناساندووە.

ڕاگەیەنراوەکە داوای ئەوە دەکات، ئەو خاڵە گومرگییانە ھەڵبگیرێن و لێکۆڵینەوە لەو کردە شکێنەرەی دەستور بکرێت و سیاسەت و بازرگانی تێکەڵ بە مەعریفە و زانست نەکرێت، ھەروەھا حوکمی سەربازیی لەسەر کەرکوک ھەڵبگیرێت و ژیان و دەسەڵاتی مەدەنی بۆ شارەکە بگێڕدرێتەوە.

 

کوردستان

ھەولێر.. لە دوو ڕووداوی ھاتووچۆدا دوو کەس گیانیان لەدەستدا

خەڵک-

وتەبێژی پۆلیسی ھاتووچۆی ھەولێر ڕاگەیەنراوێکی بڵاوکردەوە و تیایدا ڕایگەیاندووە، ئەمڕۆ لە دوو ڕووداوی ھاتووچۆدا لە سنوری پارێزگای ھەولێر، دوو کەس گیانیان لەدەستداوە.

فازڵ حاجی، وتەبێژی پۆلیسی هاتووچۆی هەولێر رایگەیاند: ئەمڕۆ لە دوو ڕووداوی ھاتووچۆدا لە سنوری پارێزگای ھەولێر دوو کەس گیانیان لەدەستداوە.

ڕووداو یەکەم له ‌شارۆچكه‌ی كۆڕێ له ‌نزیك شیره‌سوار ڕوویداوە، کاتێک ئۆتۆمبێلێکی جۆری سۆزۆكی بەھۆی تیژڕەوییەوە کۆنترۆڵی نەماوە و خۆی کێشاوە بە چوار پیادە دا، کە لەپێش فرۆشگەیەک وەستابوون، لە ئەنجامدا یەکیان گیانی لەدەستداوە و سیانەکەی دیکەش بە سەختی بریندار بوون.

ڕووداوی دووەمیش لە کاتژمێر 3:30 له‌سه‌ر رێگەی سه‌ره‌كی هه‌ولێر-كه‌ركوك له‌ نزیك گوندی سێقووچان ڕوویداوە، کاتێک تاکسییەکی جۆری کرۆلا به‌هۆی تیژڕەوییه‌وه‌ کۆنترۆڵی لەدەستداوە، لە ئەنجامدا لە شەقام دەرچووە و وەرگەڕاوە، لەو ڕووداوەشدا شۆفێری تاکسییەکە گیانی لەدەستداوە.

بەردەوام بە لە خوێندنەوە

کوردستان

كچێكی ئێزدی تر لەژێر چنگی داعش رزگار دەكرێت

خەڵك- بەشی هەواڵ
بەڕێوەبەری نوسینگەی رزگاركردنی رفێنراوانی ژێردەستی داعش رایدەگەیەنێت، حكومەتی هەرێمی كوردستان كچێكی تری ئێزدی لە سوریا رزگاركردووە كە چوار ساڵ لەمەوبەر لەلایەن چەكدارانی داعشەوە رفێندرابوو.

حسێن كۆرۆ قاییدی، بەڕێوەبەری نوسینگەی رزگاركردنی رفێنراوانی ژێردەستی داعش لەلێدوانێكدا بۆ ئاژانسی ئەنادۆڵ رایگەیاندووە”حكومەتی هەرێمی كوردستان تائێستا زیاتر لە 3 هەزار و 332 كوردی ئێزدی لە چنگی داعش لە عیراق و سوریا رزگار كردووە، ئەمڕۆش كچێكی تری ئێزدی تەمەن 19 ساڵان، بەناوی نور عەڤدۆ لە سوریا رزگاركرا، كە دانیشتوی گوندی دوو گرێی سنوری قەزای شنگالە”.

بە وتەی قاییدی “لەكۆی 6 هەزار و 417 رفێنراوی ئێزدی، تائێستا 3 هەزار و 332 كچ و ژنی ئێزدی لە عیراق و سوریا رزگاركراون، كە لە مانگی ئابی ساڵی 2014دا لەلایەن داعشەوە بێ سەروشوێن كرابوون”، ئاماژەی بەو كار و پلانانەش كرد كە هەیانە بۆ هێنانەوەی زیاتر لە 3 هەزار كەسی تر لە عیراق و سوریا.

بەڕێوەبەری نوسینگەی رزگاركردنی رفێنراوانی ژێردەستی داعش دەڵێت” ڕێكخراوی داعش لە ماوەی رابردودا بە بەرنامەیەكی رێكخراو، ئایین و زمان و كلتوری بە رفێنراوە ئێزدییەكان گۆڕیوە، بەشێوەیەك منداڵانی لەسەر بیروباوەڕی توندڕەوی راهێناوە، حكومەتی هەرێمی كوردستانیش بەردەوام لە هەوڵدایە بۆ ئەوەی دۆخی دەروونی و جەستەیی ئەو رزگاربووانە بگەڕێنێتەوە باری ئاسایی جارانیان”.

لە مانگی حوزەیرانی ساڵی 2014، دوای ئەوەی چەكدارانی رێكخراوی داعش شاری موسڵ سەنتەری پارێزگای نەینوایان كۆنترۆڵ كرد، دەستیان گرت بەسەر زۆرێك لە ناوچەكانی دەوروبەری شارەكە، بە تایبەت ئەو ناوچانەی كە جێنیشتەجێی ئێزدی و مەسیحییەكان بوون، لەو شاڵاوە دڕندانەیەشدا هەزاران كچ و ژنی ئێزدییان وەك سەبایە بەدیل گرت و لە بازاڕەكانی موسڵ و رەقەدا وەك كۆیلە كڕین و فرۆشتنیان پێوەدەكرد.

بەردەوام بە لە خوێندنەوە

کوردستان

پەروەردە مامۆستایان ئاگادار دەكاتەوە

خەڵك – بەشی هەواڵ
بەڕێوەبەرایەتی پەروەردەی كەلار، داوا لە مامۆستایانی سەرجەم قۆناغەكان دەكات، بەهیچ شێوەیەك داوای مەلزەمە لە خوێندكاران نەكەن، دەشڵێـت:”بۆ خۆێندن پشت بە ئەو پڕۆگرام و كتێبانە ببەستن، كە لە لایەن وەزارەتی پەروەردە دانراوە”.

بەڕێوەبەرایەتی پەروەردەی كەلار لە ئاگادارییەكدا، كە وێنەیەكی دەست (خەڵك) كەوتووە ئاڕاستەی سەرجەم ناوەندەكانی خوێندنی سەر بە سنوری پەروەردەكەی كردووە، ڕایگەیاندووە، بۆ مامۆستایانی سەرجەم قۆناغەكان بەهیچ شێوەیەك داوای مەلزەمە لە خوێندكاران نەكەن.

دەشڵێت:”بۆ خۆێندن تەنها پشت بە ئەو پڕۆگرام و كتێبانە ببەستن، كە لەلایەن وەزارەتی پەروەردە دانراوە”.

ئەمە لەكاتێكدایە، بەشێك لە مامۆستایان مەلزەمە وەك جێگرەوەی پرۆگرامی خوێندن بەكاردەهێنن، كە پێشتر لە لایەن وەزارەتی پەروەردەوە بە فەرمی بەكارهێنانی قەدەغە كراوە.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین