ئەمڕۆ، د.هەڤاڵ ئەبوبەكر پارێزگاری سلێمانی، لە دیوانی پارێزگادا، پێشوازیكرد لە قوباد تاڵەبانی جێگری سەرۆكی ئەنجومەنی وەزیرانی حكومەتی هەرێمی كوردستان‌و لە ڕێوڕەسمێكدا وەك دەستپێشخەرییەكی نوێی حكومەتی خۆجێیی سلێمانی و حكومەتی هەرێمی كوردستان، سیستمی یەك پەنجەرەی پارێزگای سلێمانی و فەرمانگاكانی تری سنوری پارێزگای سلێمانی، كردەوە.
بەپێی راگەیەندراوێكی پارێزگەی سلێمانی، ئەم سیستمە ڕۆتین كەمدەكاتەوەو بە كاتێكی كەم ڕێكارو ئیشەكان جێبەجێدەكات و مامەڵەكان خێرا دەكات، بنەماكانی شەفافیەت و لێپرسینەوە كارادەكات و متمانەی هاووڵاتیان بە دامودەزگاكانی دەوڵەت زیاتر دەكات، كاتێكی زۆر بۆ هاووڵاتیان دەگەڕێنێتەوەو فەرمانبەرو فەرمانگاكان لە خزمەتی هاووڵاتیاندا دەبن، بنەماكانی حكومەتی هاووڵاتی و حكومەتی خزمەتگوزاریی و سەروەریی یاسا پتەو دەكات.
پارێزگاری سلێمانی سوپاسی دەستپێشخەریی و هەوڵەكانی جێگری سەرۆكی ئەنجومەنی وەزیران و نووسینگەی بەڕێزیان و تیمە تەكنیكییەكان و پارێزگای سلێمانی و فەرمانگاكانی تری كرد بۆ سەرخستنی ئەم سیستمە نیشتمانییە نوێیە.
