وەزیری پەروەردەی عێراق بەڵێنی چارەسەركردنی كێشەی مامۆستایانی وانەبێژ دەدات و ڕایدەگەیەنێت، لە ماوەی دوو هەفتەی ڕابردوودا 289 هەزار و 300 فەرمانبەری کارگێڕی و مامۆستای وانەبێژ كراون بە هەمیشەیی.
ئیبراهیم نامیس جبوری، وەزیری پەروەردەی عێراق ژمارەی ئەو مامۆستا وانەبێژ و فەرمانبەرانی ئاشكراكرد، كە بە هەمیشەیی دادەمەزرێن و بڕیاری ژمارە ٣١٥ی پشتڕاست كردەوە، هاوکات بەڵێنی چارەسەرکردنی ئەو کێشە و ئاستەنگانەی دا، کە کەرتی پەروەردەی ئەنبار بەدەستیەوە دەناڵێنێت.
وتیشی، “واقیعی پەروەردەیی لە پارێزگای ئەنبار شاهیدی بوژانەوە و خۆشگوزەرانییە”.
ئاماژەی بەوەشکرد، “لە ماوەی دوو هەفتەی ڕابردوودا 289 هەزار و 300 فەرمانبەری کارگێڕی و وانەبێژ لەسەر میلاكی هەمیشەیی دانراون و 17 هەزار وانەبێژی دیكەش لەسەر بڕیاری 315 دامەزراون”.
لە میانی دیدارەکەیدا لەگەڵ ژمارەیەک لە پەروەردەکاران و مامۆستایان، وەزیری پەروەردە بەڵێنیدا “ئەو کێشە و ئاستەنگانەی، کە کەرتی پەروەردەی پارێزگای ئەنبار بەدەستیەوە دەناڵێنێت، لەوانەش دوو دەوام و سێ شەفت، دوای پەسەندکردنی یاسای بودجە چارەسەر بکات”.
