راوێژكارێكی مسعود بارزانی وەك بریكاری وەزارەتی دارایی عێراق دەستبەكاربوو و ڕایدەگەیەنێت، لەگەڵ هاوكارەكانی لە حكومەت وەك یەك تیم بە دڵسۆزییەوە كار دەكەن، بۆ جێبەجێكردنی كارنامەی حكومەت و سەرخستنی حكومەتەكەی محەمەد شیاع سودانی.
مەسعود حەیدەر، راوێژكاری مسعود بارزانی سەرۆكی پارتی دیموكراتی كوردستان لە هەژماری تایبەتی خۆی لە فەیسبوك وێنەكەیەكی خۆی لەگەڵ محەمەد شیاع سودانی، سەرۆك وەزیرانی عێراق بڵاوكردووەتەوە و ڕایگەیاندووە، لە ئەمڕۆ وەكو بریكاری وەزارەتی دارایی حكومەتی فیدراڵ دەستبەكاربووە.
ئاماژەی بۆ ئەوەشكردووە، كە بۆ جێبەجێكردنی كارنامەی حكومەت و سەرخستنی حكومەتەكەی محەمەد شیاع سودانی لەگەڵ هاوكارەكانی لە حكومەت وەكو یەك تیم بە دڵسۆزییەوە كار دەكەن.
ئاشكراشیكردووە، كە محەمەد شیاع سودانی “بە فەرمی پشتیوانی كردووە بۆ وەرگرتنی ئەو پۆستەش رایسپاردم”.
