لە کاردانەوەی ئەو هێرشە ڕەگەزپەرستیانەی لە تورکیا کرانە سەر ئاوارەکانی سووریا، هاووڵاتییانی ناوچە داگیرکراوەکانی ڕۆژئاوای کوردستان و باکووری سووریا خۆپیشاندانی ناڕەزاییان ئەنجامدا و هێرشیان کردە سەر چەند خاڵێکی هێزەکانی تورکیا.
لە شاری قەیسەری تورکیا، تورکە ڕەگەزپەرستەکان هێرشیان کردە سەر دەیان ماڵ و موڵکی ئاوارەکانی سووریا لەو شارە و ژمارەیەکیان سووتاندن.
ئەو ڕەفتارەی ڕەگەزپەرستەکان ناڕەزایی جەماوەری سوورییەکانی لێکەوتەوە و لە بەشێک لە ناوچە داگیرکراوەکانی ڕۆژئاوای کوردستان و باکووری سووریا خۆپیشاندانی ناڕەزایی ئەنجام درا.
خۆپیشاندەدان هەر بەوەوە نەوەستان، بەڵکو هێرشیشیان کردە سەر چەند خاڵێکی هێزەکانی تورکیا و ئاڵای وڵاتەکەیان داگرت. هەروەک بەشێک لەو ئاڵایانەی تورکیاشیان دڕاند کە لە شەقامەکاندا هەڵکراون.
ئاژانسی هەواڵی هاوار بڵاویکردەوە، خۆپیشاندەران هەڵیانکوتاوەتە سەر دەروازەی جەرابلوس و هێزەکانی تورکیاش تەقەیان لێکردوون.
هاوکات بەرپرسانی ئەو ناوچانەی کە لەلایەن ئەنقەرەوە پشتیوانی دەکرێن، پەنایان بردووەتە بەر بڕینی ئینتەرنێت بۆ ڕێگرتن لە تەشەنەکردنی ناڕەزاییە جەماوەرییەکان لە دژی سوپای تورکیا.
