بەڕێوەبەرایەتی کۆمپانیای دابەشکردنی بەرھەمە نەوتییەکانی عێراق ڕایگەیاند، عێراق ھاوردەکردنی بەنزینی بۆ نیوە دابەزاندووە و سەرکەوتوو بووە.
حسێن تاڵیب،بەڕێوەبەری گشتی کۆمپانیای دابەشکردنی بەرھەمە نەوتییەکانی عێراق ڕایگەیاند، دوای بەگەڕخستنی پاڵاوگەی کەربەلا، ھاوردەکردنی بەنزین رۆژانە کەمبووەتەوە لە 14 ملیۆن لیترەوە بۆ حەوت ملیۆن لیتر.
دەشڵێت:”حکومەتی عێراق لە ھەوڵی بەردەوامدایە بە تایبەتی وەزارەتی نەوت بۆ فراوانکردنی کاری وەبەرھێنان لە بواری نەوت و غاز و راگرتنی ھاوردەکردنی بەنزین لە دەرەوە”.
بەڕێوەبەری گشتی کۆمپانیای دابەشکردنی بەرھەمە نەوتییەکانی عێراق ئاماژەی بەوەشکردووە، بۆ وەبەرھێنانی نەوت بەشێوەیەکی دروست و بنیاتنانی پاڵاوگەی نوێ و پێویست بۆ بەرھەمھێنانی بەنزینی ناوخۆیی، حکومەت پلانێکی ستراتیجی بۆ داھاتوو داڕشتووە.
