لەبارەی جۆرێك ڕۆنەوە، كە تێكەڵ كراوی چەند ڕۆنێكە و بە خۆماڵی بە هاووڵاتیان فرۆشراوە، لیژنە هاوبەشەكانی سلێمانی ڕایدەگەیەنێت، لەهەر ماڵ و ماركێتێكدا هەیە بیگەڕێنێتەوە بۆ ئەو شوێنەی لێی كڕیوە.
قائیمقامیەتی سلێمانی لە ڕاگەیەنراوێكدا ئاماژەی بەوەكردووە، دوای ئەوەی لە ماڵێكدا دەستگیرا بەسەر بڕێكی زۆر ڕۆندا، كە لە تێكەڵەی چەند ڕۆنێك دروستكراوە و خراوەتە دەبەی نوێوە و بەرواری بەكارهێنانی درێژكراوەتەوە و بە ڕۆنی خۆماڵی دەفرۆشرا، لیژنە هاوبەشەكانی قائیمقامیەتی سلێمانی لە هەڵمەتێكدا لە بازاڕ و ماركێتەكان زیاتر لە 4تۆن لەو ڕۆنە تێكەڵەیەی كۆكردەوە.
لیژنە هاوبەشەكان هاوڵاتیان و فرۆشگاكان ئاگادار دەكاتەوە، “هەر كەسێك لەو جۆرە ڕۆنەی كڕیوە بیگەڕێنێتەوە بۆ خاوەنەكەی، لە هەرشوێنێكیشدا ببینرێت، دەستی بەسەردا دەگیرێت و لەناو دەبرێت”.
ئاشكراشی كردووە، ڕۆنەكە ناوی (كازم عەجام)ە و باركۆد و لەزگەی دروستكراوی لێدراوە و بە نرخێكی زیاتر لە رۆنی ئاسایی لە بازاڕەكاندا بە ڕۆنی خۆماڵی فرۆشراوە.
