بێگەرد تاڵەبانی: دەبێت پرۆسەی وەرگرتنی گەنم لە جووتیاران لەسەرتاسەری عێراق بەیەک شێوە بێت.
ئەمڕۆ یەک شەممە 21/4/2024 وەزارەتی کشتوکاڵ و سەرچاوەکانی ئاو لە حکومەتی هەرێم بڵاویکردەوە، وەزیری کشتوکاڵ و ستافێکی باڵای وەزارەت، لەگەڵ سوزان کۆچەر جێگری سەرۆکی لێژنەی کشتوکاڵ و ئاودێری لەپەرلەمانی عێراق و وەفدێکی تایبەت لە وەزارەتی کشتوکاڵی عێراق و نوێنەری فەرمانگەی پەیوەندییەکانی حکومەتی هەرێم لە بەغدا کۆبوونەوە،
لە بڵاوکراوەکەدا هاتووە، بەمەبەستی تاوتوێکردنی پلانی وەرگرتنی گەنم و رووبەری داچێنراوی گەنم و ڕێژەی پێشبینیکراو بۆ بەرهەمی ئەمساڵ لە هەرێمی کوردستاندا، جەختکرایەوە پێویستە هەموو ئەو بڕە گەنمە وەربگیرێت لە جوتیارانی هەرێمی کوردستان، کە ئەمساڵ بەرهەمدێت و هەمان مامەڵەی یەکسان لەنێوان جوتیارانی هەرێم و ناوەراست و خوارووی عێراق هەبێت.
وەزاەرتی کشتوکاڵ ئاماژە بەوەدەکات، داتاو و بەرچاو روونی و کارئاسانی و زانیاری پێویست خراوەتە بەردەستی لێژنە پەیوەندیدارەکان ، کە لەمیانی سەردانە مەیدانیەکانیان بۆ شارەکانی هەرێمی کوردستان ، کە هاتوون بۆ بینینی ڕاستەوخۆی رووبەری داچێنراو و ڕێژەی پێشبینیکراو بۆ بەرهەمی گەنمی ئەمساڵ.
لە بلاوکراوەکەدا هاتووە، بڕیاردرا بە سەرۆکایەتی وەفدێکی تایبەتمەندی تەکنیکی وەزارەتی کشتوکاڵ و سەرچاوەکانی ئاوی هەرێم سەردانی وەزارەتی کشتوکاڵ و بازرگانی عێراق بکرێت، بۆ مەبەستی پاڵپشتیکردنی جوتیارانی هەرێمی کوردستان بۆ ئەوەی بەیەکسانی مامەڵەیان لەگەڵ بکرێت هاوشێوەی جوتیارانی شارەکانی ناوەراست و خوارووی عێراق.
بەپێی داتا و بەدواداچوونەکانی وەزارەتی کشتوکاڵ و سەرچاوەکانی ئاوی حکومەتی هەرێم، ئەمساڵ نزیکەی سێ ملیۆن دۆنم زەوی داچێنراوە و پێشبینی ڕێژەی بەرهەمێکی زۆر باشدەکرێت، بەرەچاوکردنی کەشوهەوا و دابارینێکی زۆرباش لەوەرزی ئەمساڵدا.
هاوکات سەرەتای ئەم مانگە لە عێراق دەستکرا بە وەرگرتنی گەنمی جووتیاران و بڕیاریشە پرۆسەکە بەردەوامبێت تاوەکو سەرجەم بەرهەمەکان لە جووتیاران وەردەگیرێت.
