سەرۆکی پارتی چاکسازی تورکمان دەڵێت: پێشوازی لە دەستنیشانکردنی رۆژی بەرێوەچوونی هەڵبژاردنی پەرلەمانی کوردستان دەکات.
عەبدولقادر بازرگان، سەرۆکی پارتی چاکسازی تورکمان لە راگەیەندراوێکدا بڵاویکردووەتەوە کە ئەوان وەک پارتی چاکسازی تورکمان پێشوازی لەم بڕیارە دەکەین و پشتیوانی خۆمان بۆ ئەنجامدانی هەڵبژاردن دووپاتدەکەینەوە، سەرەرای نیگەرانیەکانمان لەمەڕ بڕیارەکانی دادگای فیدراڵی و هەڵوەشاندنەوەی کورسی کۆتاکان، کۆبوونەوەکانمان بەردەوامن بەئامانجی یەکخستنی هەڵویستمان و خۆئامادەکردنمان بۆ چۆنیەتی مامەڵەکردن لەگەڵ ئەو دۆخە نوێیەی کە لە ئارادایە.
دەشڵێت، جەختدەکەنەوە کە ئەنجامدانی هەڵبژاردن گرنگە بۆ بەردەوامی و بەرەوپێشبردنی زیاتری پرۆسەی سیاسی و دیموکراسی و پاراستنی قەوارەی دەستوری هەرێمی کوردستان و دەربازکردنی قۆناغی ئێستای هەرێمەکەمان، جارێکی تر پشتیوانی و پاڵپشتی خۆمان وەک پێکهاتەی تورکمان و پارتی چاکسازی تورکمان بۆ بەرێوەچوونی هەڵبژاردن دووپاتدەکەینەوە و داواکاریشن لە سەرجەم لایەنەکان هاوکار و هەماهەنگ بن و هەموو پێکەوە پشتیوانی بەرێوەچوونی هەڵبژاردن بکەین و هەوڵی سەرکەوتنی ئەو پرۆسە دیموکراسیە بدەین.
ئەمڕۆ یەکشەممە نێچیرڤان بارزانی، سەرۆکی هەرێمی کوردستان رۆژی ١٠ی حوزەیرانی ٢٠٢٤ی بۆ هەڵبژاردنی پەرلەمانی کوردستان دیاریکرد.
