د. کامه‌ران ژاژڵه‌یی، پزیشکی پسپۆڕی زانستی خۆراک ڕایگەیاندووە، هەست کردن بە برسیەتی ڕاستەوخۆ یان دوای ماوەیەکی کەم لە نان خواردن ڕەنگە ئاماژە بێ بە بوونی کێشیەکی تەندروستی و کۆمەڵێک هۆکاری هەیە.
وەك ئەو پزیشكی پسپۆڕی خۆراكە ئاماژەی پێ كردووە، گرنگترین هۆكارەكانی هەستكردن بە برسیەتی دوای ماوەیەكی كەم لە نان خواردن ئەمانەن:
۱ – ڕێجمی قورس و ناتەندروست: هەندێ مرۆڤ لە کاتی ڕێجیم بەردەوام هەست بە برسیەتی ئەکات بە تایبەت کاتێک ڕێجیمەکە کالۆری کەم بێت یان ماددە پڕۆتێن و ڕیشاڵەکانی کەم تێدا بێت بەهۆی بەرزبوونەوەی ئاستی هۆرمۆنی گڕیلیین، کە بە هۆرمۆنی برسیەتی ناسراوە.
٢- کەم خەوی: تێکچوونی خەو و نەنووستن بۆ ماوه‌ی پێویست لە شەودا یەکێکە لەو هۆکارانەی دەبێتە ئەوەی کەسەكە هەست بە تێربوون نەکات و حەز بە خۆراکی دەوڵەمەند بە چەوری و شیرینی بکات لە ئەنجامی هەست کردن بە بێهێزی و شەکەتی.
٣ – نه‌خۆشی شه‌کره- جۆری یەکەم یا دووەم یا شەکرەی کاتی دووگیانی: یه‌کێک له گرنگترین نیشانه‌کانی نه‌خۆشی شه‌کره برسیه‌تی ڕاستەوخۆ یان دوای ماوەیەکی کەم لە خواردن.
٤- غوودی ده‌ره‌قی چالاک و غوودی ژەهراوی: کاتێ ڕێژەی هۆرمۆنەکانی غووده‌ی دەرەقی زیاتر دەبێت؛ ڕێژەی سووتانی وزە لە ناو لەشدا خێراتر دەبێت لەگەڵ زیندە چالاکی خانەکانی جەستە، بەڵام لە کاتی غووده‌ی دەرەقی چالاک کێشی لەش کەم دەکات و نابێتە هۆی قەڵەوی .
٥ – دڵه‌ڕاوکێ و قه‌له‌قی: لە کاتی سترێس لەش هۆرمۆنی کۆرتیزۆن دەڕێژێت و ئەمەش وات لێ دەکات، کە بڕێکی زیاتری لە خۆراک بخوێت بە تایبەت شیرینی و چەوری .
٦ – وشکبوونەوەی جەستە: بە بەردەوامی وات لێ دەکات هەست بە برسێتی بکەیت، چونکە هەمان بەشی مێشک بەرپرسە لە هەست بە تینوویەتی و برسیەتی، بۆیە کەم خواردنەوەی بڕی پێویست لە ئاو و خواردنی سەوزە و میوە یەکێکە لە هۆکارەکانی تێر نەبوون.
٧- زیادەڕەوەی لە وەرزش و ڕاهێنانی قورس: ئەمەش ئەبێتە هۆی خێرابوونی میتابۆلێزم و زیندە چالاکی و لە ئەنجامدا مرۆڤەکە هەست بە برسیەتی ئەکات، چونکە جەستەی پێویستی بە بڕی زۆرتر لە خۆراکە.
٨ – نەبوونی تەرکێز و خەیاڵ ڕۆیشتن لە کاتی خواردن یان خەریک بوونی بە کارهێنانی مۆبایل یا سەیرکردنی تەلەفزیۆنەوە.
٩- کاریگەری لاوەکی کۆمەڵێک دەرمان، بۆ نموونە هەندێ دەرمانی دژە خەمۆکی و دژی حساسیه‌ت و کۆرتێکۆستیرۆیدەکان.
