شارەزایەکی کەشناسی پێشبینییەکانی کەشوهەوای بۆ ڕۆژانی ئایندە ڕاگەیاند، لە ناوچە شاخاوییەکان و سەنتەری بەشێک لە شارەکان بەفر دەبارێت.
ئاراس جەبار، شارەزای کەشناسی ڕایگەیاند، سبەینێ پێنجشەمە، ئاسمانی ناوچەکانی باشوری ھەرێم بە زۆری نیمچە ھەور دەبێت، ناوچەکانی ناوەڕاست و باکووری ھەرێم ساماڵ و پەڵە ھەور دەبێت، پلەکانی گەرما بەڕاورد بە ئەمڕۆ جێگیر دەبێت و کاریگەری شەپۆلی بەفر و بارانبارین لە کاتەکانی بەرەبەیانەوە لە ناوچەکانی باکوری سعودیە و باشور و ڕۆژئاوای عێراقەوە دەستپێدەکاتەوە، بەفر لە بەرزاییەکاندا دەبارێت لەگەڵ نزمبوونەوەی بەرچاوی پلەکانی گەرما.
ئاماژەی بەوەشکرد، لەکاتەکانی ئێوارە بەدواوە بارانی مامناوەند و پچر پچر درێژ دەبێتەوە بۆ سەر ناوەڕاستی عێراق و ناوچەکانی سنووری ئیدارەی گەرمیان، پارێزگای ھەڵەبجە، سلێمانی و کەرکوک کە بەشێوەیەکی گشتی بەھۆی نزمبوونەوە پلەکانی گەرما لەسەرجەم ناوچە شاخاوییەکانی پارێزگای سلێمانی و ھەڵەبجە بەفر بارین دەبێت.
ئەو شارەزای کەشناسییە ئەوەشی خستەڕوو، لە سەنتەری شاری سلێمانی و ئەو ناوچانەی بەرزیان زیاترە لە ٨٠٠ مەتر لە ئاستی ڕووی دەریا پێشبینی دەکەین لەکاتەکانی نیوەی شەو بەدواوە بەفر ببارێت، کاریگەری ئەم شەپۆلە بۆ ناوچەکانی پارێزگای دھۆک، ھەولێر و ئیدارەی ڕاپەرین لاواز دەبێت و تەنھا ئەگەری نمە باران لەھەندێک کاتدا دەبێت لەو ناوچانەدا، بای باکوری ڕۆژھەڵات بۆ سبەینێ و دوو سبەی بە چالاکی دەمێنێتەوە لەناوچەکانی پارێزگای سلێمانی بەخێرای ١٠ تا ٣٠ کیلۆمەتر دەبێت لە کاتژمێرێکدا.
